Konfliktet brenda ndërgjegjes së adoleshentëve
Siç shohim, nuk është punë e lehtë të arrihet mosha e rritur dhe të fitohet një masë e baraspeshës. Adoleshenca është një fazë tranzicionale midis fëmijërisë dhe moshës së rritur, është një periudhë e vështirë që ngjanë me zogun që del nga veza ose mund të themi me dhimbjet që i paraprijnë lindjes së një fëmije.
Gjatë kësaj periudhe, individi kalon nëpër një proces të vetëzbulimit, në të cilin ai i eksploron aftësitë dhe potencialin e tij të saj. Kjo është gjithashtu një periudhë në të cilën individi mund të shohë rolin e tij shoqëror në të ardhmen. Mirëpo, ky vetëzbulim përfshinë adole- shentin në një varg të gjatë të konflikteve, një proces i provës dhe gabimit, që do t’i sjellë adoleshentit shumë vuajtje. Ja disa dilema gjatë kësaj faze:
I përsosur apo i mangët?
Adoleshentët janë mjaft njohës të përparësive të tyre mendore, fizike dhe praktike. Ata gjithashtu do të jenë mjaft të vetëdijshëm për statusin e familjes dhe nivelin shoqëror. Të gjitha pikat pozitive që i shohin do ta rrisin vetëvlerësimin e adoleshentëve dhe mund t’u japin një ndjenjë të superioritetit ndaj shokëve.
“Baza për këtë ndjenjë të superioritetit mund të mos jetë aq reale ose e argumentuar mirë. Mirëpo, ajo është evidente nga pikëpamja e adoleshentit. Ai gjen në të mbështetje për moralin e lartë dhe vetësigurinë.”
Mirëpo, kjo ndjenjë e ekzagjeruar e rëndësisë mund të jetë shkak për konfliktet midis shokëve; tensionet mund të rriten midis adoleshentëve kur të shfaqin pa nevojë vetëpëlqimin e lartë para njëri-tjetrit. Ata mund të garojnë në mburrje për atë që e besojnë si forcë të tyre personale dhe shoqërore.
Megjithatë, nëpërmjet polemikave me njëri-tjetrin do të zbulojnë dobësitë e tyre fizike, intelektuale ose shoqërore. Lojërat ekipore shpesh nxjerrin në pah meritat dhe mangësitë e adoleshentëve; një adoleshent mund të kuptojë se nuk është i mirëseardhur si anëtar në ekip, sepse shokët e tij nuk e pëlqejnë dhe e shohin si barrë.
Adoleshenca është shpesh një botë misterioze për ta dhe ndoshta për të tjerët dhe kjo i shton hallet e tyre. Ndoshta qëndrimi i tyre i gjatë para pasqyrës ose shikimi i filmave është një përpjekje për të zbuluar të vërtetën për vetveten.
Prinderimi.com
Prof. Dr. Abdul Kerim Bekkar, “Adoleshentët”
(Vështrime mbi adoleshentët, si t’i kuptojmë, si t’u qasemi dhe si të ndërveprojmë me ta)
