Ministria e Arsimit, Shkencës dhe Teknologjisë (MASHT) ka publikuar rezultatet e konkursit për ndarjen e mbështetjes financiare për vajzat dhe gratë që janë regjistruar për herë të parë në vitin akademik 2025/2026 në programet e fushave të Shkencës, Teknologjisë, Inxhinierisë dhe Matematikës (STEM) në institucionet e arsimit të lartë në Republikën e Kosovës. Lajmi është publikuar bashkë me vendimin përkatës, të lëshuar nga Kabineti i Ministrit, ku figuron edhe lista e vajzave përfituese të Bursës nëpër Universitete te ndryshme publike në Republikën e Kosovës si, Universiteti i Prishtinës ”Hasan Prishtina” në Prishtinë, Universiteti ”Isa Boletini” në Mitrovicë, Universiteti Ukshin Hoti në Prizren, Universiteti Kadri Zeka në Gjilan etj.
Sipas njoftimit zyrtar, pas shqyrtimit të aplikimeve nga komisioni përkatës, 599 studente janë shpallur përfituese të kësaj mbështetjeje financiare, pasi kanë plotësuar kriteret e përcaktuara në konkurs. Ndërkohë, Ministria ka publikuar edhe listën e aplikimeve të refuzuara, ku për secilin rast janë paraqitur arsyet e refuzimit. Aplikueset që nuk pajtohen me rezultatin kanë të drejtë të paraqesin ankesë pranë Komisionit për Ankesa, brenda shtatë ditëve të punës nga data e publikimit të rezultateve.
Kjo iniciativë përfaqëson një përpjekje të rëndësishme për të inkurajuar më shumë vajza dhe gra të zgjedhin studimet në fushat STEM, të cilat vazhdojnë të jenë ndër sektorët me kërkesën më të lartë në tregun e punës, si në Kosovë ashtu edhe në nivel ndërkombëtar. Investimi në arsimimin e tyre nuk është vetëm një mbështetje individuale për studentet, por edhe një investim në zhvillimin ekonomik, teknologjik dhe shkencor të vendit.
Edhe pse numri i vajzave që regjistrohen në universitet është rritur ndër vite, në disa degë si inxhinieria, teknologjia e informacionit dhe fusha të caktuara të shkencave ekzakte, përfaqësimi i tyre mbetet ende më i ulët krahasuar me djemtë. Mbështetja financiare mund të shërbejë si një nxitje e rëndësishme për shumë të reja që përballen me sfida ekonomike dhe si rrjedhojë hezitojnë të ndjekin profesionet STEM.
Përtej mbështetjes financiare, është e rëndësishme që të vazhdohet me krijimin e mundësive për mentorim, praktika profesionale dhe aktivitete që i afrojnë të rejat me botën e shkencës dhe inovacionit. Këto iniciativa ndihmojnë në ndërtimin e një brezi profesionistesh të afta për të kontribuar në zhvillimin e vendit dhe për të shërbyer si modele frymëzimi për gjeneratat e ardhshme.
Ky program është një sinjal pozitiv se investimi në arsimin e vajzave mbetet prioritet. Megjithatë, suksesi i tij do të matet jo vetëm me numrin e përfitueseve, por edhe me mundësitë që këto studente do të kenë për të përfunduar studimet, për t’u integruar në tregun e punës dhe për të ndërtuar karriera të suksesshme në profesionet që kanë zgjedhur.
Ne si Prindërimi, e mirëpresim këtë sukses të vajzave në STEM, duke ju uruar styre suksese dhe arritje në ambiciet e tyre shkencore dhe teknologjike!
