Përfaqësuesja e Sindikatës së Bashkuar të Arsimit, Shkencës dhe Kulturës (SBASHK), Vjollca Shala, ka ngritur shqetësimin se kërkesat dhe hallet e mësimdhënësve vazhdojnë të mos dëgjohen nga Ministria e Arsimit, pavarësisht fillimit të vitit të ri shkollor.
“Hallet e mësimdhënësve nuk i ka dëgjuar as në të kaluarën Ministria e Arsimit e as tani,” deklaroi Shala, duke theksuar se pakënaqësia në sektorin arsimor po rritet çdo ditë.
Sipas saj, pas konstituimit të institucioneve të reja, SBASHK-u është i gatshëm për dialog dhe bashkëpunim, me qëllim që të paraqesë kërkesat e punëtorëve të arsimit dhe të gjenden zgjidhje të qëndrueshme. Këto kërkesa, siç theksoi ajo, janë legjitime dhe të arsyeshme, pasi kanë të bëjnë drejtpërdrejt me përmirësimin e kushteve të punës dhe dinjitetin e profesionit të mësuesit.
“Pas konstituimit të institucioneve, SBASHK-u është i gatshëm për dialog dhe takime me qëllim që t’i paraqesë kërkesat e punëtorëve të arsimit dhe të gjenden zgjidhje për to,” u shpreh Shala për RTV Dukagjini.
Megjithatë, ajo paralajmëroi se në mungesë të dialogut dhe mirëkuptimit institucional, sindikata nuk do të hezitojë të ndërmarrë veprime sindikale, përfshirë edhe grevën.
“Po, në rast se nuk do të ketë prapë dialog dhe nuk do të ketë bashkëpunim për zgjidhjen e kërkesave të punëtorëve të arsimit, atëherë nuk përjashtohen as veprimet sindikale, natyrisht as greva,” shtoi ajo.
Arsimi nis me probleme strukturore
Duke folur për gjendjen aktuale në shkolla, Shala tha se viti i ri shkollor ka filluar me shumë sfida të paadresuara. Ajo përmendi si shqetësime kryesore: subvencionimin e teksteve shkollore, vonesat në zbatimin e kurrikulave, mosrespektimin e kontratës kolektive dhe mungesën e përfshirjes së SBASHK-ut në trupat profesionalë të Ministrisë së Arsimit.
Një çështje tjetër që ka ndezur pakënaqësi është edhe zbatimi i vendimit të Gjykatës Kushtetuese për njohjen e 15 viteve të para të përvojës së punës, si dhe ngritja e vlerës së koeficientit në Ligjin e Pagave, që sipas sindikatës nuk pasqyron realisht rritjen e kostos së jetesës dhe inflacionit.
“Subvencionimi i teksteve shkollore, kurrikulat, kërkesat e punëtorëve të arsimit, kontrata kolektive, zbatimi i vendimit të Gjykatës Kushtetuese për 15 vitet e para të përvojës së punës, ngritja e vlerës së koeficientit në Ligjin e Pagave dhe mos përfshirja e SBASHK-ut në trupat profesionalë të Ministrisë së Arsimit – janë vetëm disa prej problemeve që po i bart arsimi,” theksoi Shala.
Kërkohet zgjidhje për mësimdhënësit me sëmundje kronike
Një ndër shqetësimet humane dhe sociale që SBASHK e ka ngritur prej kohësh, sipas Shalës, mbetet moszgjidhja e statusit të punëtorëve të arsimit që vuajnë nga sëmundje të rënda kronike.
“Punëtorët e arsimit të cilët janë me sëmundje të rënda kronike, për të cilët kemi kërkuar vazhdimisht që t’u mundësohet pensionimi i parakohshëm, ende nuk kanë marrë përgjigje,” deklaroi ajo.
Ajo theksoi se sindikata do të vazhdojë të kërkojë trajtim të dinjitetshëm për të gjithë punëtorët e arsimit, duke përfshirë ata që për shkak të gjendjes shëndetësore nuk mund të ushtrojnë më detyrën e tyre me të njëjtin intensitet.
Në përmbyllje, Shala apeloi për dialog të hapur dhe të sinqertë midis SBASHK-ut dhe institucioneve shtetërore, në mënyrë që të parandalohet përshkallëzimi i situatës dhe mundësia e një greve të re në sektorin e arsimit.
“Ne jemi gjithmonë për dialog. Por nëse ai mungon, atëherë jemi të detyruar të mbrojmë me çdo mjet të drejtën dhe dinjitetin e punëtorëve të arsimit,” përfundoi ajo.
