Në Fakultetin e Edukimit është zgjedhur 7 Marsi — Dita e Mësuesit, si një ditë e shënuar, për të hapur „EdTech Studion”, një laborator e hapësirë me pajisje moderne që do t’u ndihmojë mësimdhënësve të ardhshëm të jenë gati dhe të përgatitur për kohën e zhvillimeve të shpejta teknologjike dhe inteligjencës artificiale.
Gjatë kësaj ngjarjeje të rëndësishme për Universitetin e Prishtinës, rektori Arben Hajrullahu tha se një laborator i tillë, do t’ua mundësojë mësuesve e mësueseve të Kosovës, të jenë në hap me kohën. Me arritje të tilla, sipas rektorit Hajrullahu, „ata pas nesh do ta kenë më të lehtë që ta zënë hapin me zhvillimin teknologjik”.
Duke konstatuar që Fakulteti i Edukimit ka rëndësi të veçantë për zhvillimin dhe interesin e vendit, pasi këtu formësohen mësimdhënësit e ardhshëm, rektori Hajrullahu u ndal te një program i ri që pritet të nisë në këtë fakultet. Tha se programi Teknologjia arsimore është e ardhmja.
Ministrja e Arsimit, Arbërie Nagavci, shpjegoi se në ditë të tilla feste, gëzohemi shumë kur shohim rezultate konkrete që e bëjnë më atraktiv sistemin arsimor, ndërsa përfaqësuesja e Komisionit Evropian, Lucia Parducci, deklaroi se ky projekt është vetëm fillimi, pasi digjitalizimi e inovacioni në arsimin e Kosovës do të zhvillohen edhe më tutje në të ardhmen.
Dekani Blerim Saqipi, tha se laboratori i përuruar sot, por edhe tjetri i inauguruar vitin që shkoi, do të jenë të hapur edhe për shkollat me të cilat bashkëpunon Fakulteti i Edukimit. Sipas tij, në raport me vitin e pandemisë, gjithçka në këtë fakultet është e re dhe e rimodeluar, por parimi i punës së menaxhmentit është të mos krahasohemi me të kaluarën e as me fakultetet këtu afër, por vetëm me ato jashtë rajonit.
Puna e kryer në Fakultetin e Edukimit, konstatoi Saqipi, është dëshmi se në Kosovë mund të implementohet ndryshimi, ndërsa para të pranishmëve foli edhe kryesuesja e Këshillit Shtetëror të Cilësisë në Agjencinë e Kosovës për Akreditim, Hasnije Ilazi.
Pajisja me mjetet e kohës së fundit e „EdTech Studios” u mundësua nga projekti i BE-së „Transformimi i Sistemit Arsimor në Kosovë dhe Shqipëri duke Përdorur Teknologji Digjitale në Edukimin e Mësuesve” (TKAEDITE), projekt që zbatohet nga Fakulteti i Edukimit. Profesoresha dhe koordinatorja e këtij projekti nga UP-ja, Krenare Pireva-Nuçi, e shpjegoi në detaje se si do t’u ndihmojë kjo studio studentëve dhe arsimit të së ardhmes.
Në fund, folësit në këtë ngjarje, përuruan laboratorin dhe vizituan ambientet e tij./Telegrafi/
*Klikoni KËTU për t´u bërë pjesë e kanalit zyrtar të Rrjetit të Prindërve të Kosovës në Viber.
