U mbajt sesioni informues “Rritja e ndërgjegjësimit në shkolla për dimensionin dixhital të dhunës, me fokus tek dhuna ndaj vajzave”
Komuna e Obiliqit, në bashkëpunim me Ministrinë e Arsimit, Shkencës, Teknologjisë dhe Inovacionit (MAShTI), organizoi sesionin informues me temën “Rritja e ndërgjegjësimit në shkolla për dimensionin dixhital të dhunës, me fokus tek dhuna ndaj vajzave”. Ky sesion u mbajt në Gjimnazin “17 Shkurti” në Obiliq, me pjesëmarrjen e nxënësve, mësimdhënësve dhe përfaqësuesve institucionalë.
Në këtë aktivitet mori pjesë edhe zëvendësministri i Arsimit, Shkencës, Teknologjisë dhe Inovacionit, z. Arsim Ademi, i cili theksoi rëndësinë e organizimit të sesioneve të tilla për parandalimin e dhunës dixhitale dhe për vetëdijesimin e të rinjve për rreziqet që vijnë nga interneti. Ai nënvizoi përkushtimin e MAShTI-t përmes dokumenteve mbështetëse dhe planprogrameve mësimore që synojnë edukimin e hershëm dhe forcimin e sigurisë në mjedisin dixhital.
Drejtoresha e Drejtorisë Komunale të Arsimit në Komunën e Obiliqit, znj. Fitore Hashani, theksoi rëndësinë e ruajtjes së bashkëpunimit mes prindërve, nxënësve dhe mësimdhënësve. Ajo vlerësoi organizimin e këtij sesioni, duke shtuar se kjo qasje ndihmon në krijimin e një mjedisi më të sigurt për të rinjtë dhe në vetëdijesimin e tyre për rreziqet e dhunës dixhitale.
Ky aktivitet u realizua në kuadër të “16 Ditëve të Aktivizimit” kundër dhunës në baza gjinore dhe dëshmon përkushtimin e Komunës së Obiliqit për të vazhduar bashkëpunimin me institucionet qendrore dhe shkollat lokale, me qëllim promovimin e sigurisë dhe mirëqenies së fëmijëve tanë.
Njofton: Zyra për Informim në Obiliq.
