Ministri për Evropën dhe Punët e Jashtme i Shqipërisë, Igli Hasani, ka zhvilluar një vizitë këtë të diel në shkollën shqipe “Alba Life” në New York, e cila, sipas ministrit, përfaqëson një institucion kyç për ruajtjen dhe promovimin e trashëgimisë kulturore shqiptare, njofton Prinderimi.com
Nëpërmjet një publikimi në rrjetet sociale, Hasani njoftoi shpërndarjen e 300 abetareve për nxënësit, duke e cilësuar këtë veprim si një gjest simbolik që mbështet përpjekjet e tyre në mësimin dhe përvetësimin e gjuhës amtare.
“Kënaqësi e veçantë të vizitoja shkollën shqipe “Alba Life” në New York – një institucion që luan një rol të rëndësishëm në ruajtjen dhe promovimin e kulturës shqiptare. Në këto 17 vite, kjo shkollë ka qenë shembull frymëzues i bashkëpunimit dhe përkushtimit në arsim, duke fituar me meritë titullin ‘Ambasador i Kombit’. Me këtë rast, shpërndava 300 abetare për nxënësit, si mbështetje simbolike në rrugëtimin e tyre drejt mësimit të gjuhës amtare. Falënderime nxënësve për mikpritjen në këtë tempull të dijes kuq e zi dhe stafit të shkollës për përkushtimin ndaj edukimit të brezave të rinj me dashuri për gjuhën dhe Shqipërinë”, ka shkruar Hasani.
© Prinderimi.com Të gjitha të drejtat e rezervuara.
