Parimet që duhen zbatuar për të qenë prindër të suksesshëm të vetëm
Më poshtë janë radhitur disa veprime që prindërit e vetëm mund të ndërmarrin për të rritur fëmijë të suksesshëm dhe për të minimizuar konfliktet prind-fëmijë:
- Lëvroni një rrjet miqsh dhe marrëdhëniesh. Bëni miq të mirë dhe ftoni ata, së bashku me fëmijët e tyre, në tubime shoqërore dhe vakte me fëmijët tuaj. Njihuni me familje të tjera me një prind (mbani parasysh që, ndonëse jeni prind i vetëm, nuk jeni të vetmuar). Miqtë e ngushtë mund t’ju ofrojnë mbështetje emocionale, shoqëri, ndihmë në raste emergjente, kujdes për fëmijët dhe një vesh dashamirës për t’ju dëgjuar. Zgjidhni me kujdes njerëz të besueshëm dhe besnikë, që meritojnë besimin tuaj dhe që do të jenë pranë jush në kohë nevoje. Nëse keni një familje të zgjeruar, ruajini këto lidhje dhe vizitohuni rregullisht. Mos ngurroni ta ndani barrën e prindërimit me anëtarët e familjes dhe kërkoni ndihmën e tyre sa herë që keni nevojë.
- Organizoni shëtitje të shumta dhe aktivitete argëtuese me fëmijët tuaj. Ruani kujtime nga këto momente për t’ju përkujtuar juve dhe fëmijëve kohët dhe ngjarjet e gëzuara.
- Përfshini fëmijët në vendimmarrje dhe zgjidhjen e problemeve. Kjo do të rrisë vetëbesimin e tyre dhe do t’i bëjë të ndihen anëtarë të çmuar të familjes. Në familjet me një prind të vetëm, ndihma dhe bashkëpunimi i çdo fëmije është e domosdoshme çdo ditë. Puna në ekip dhe ndarja e përgjegjësive do të zvogëlojë presionet me të cilat ballafaqoheni.
- Mos lejoni që zemërimi apo ankthet tuaja personale të ndikojnë tek fëmijët. Nëse mund të shihni botën nga këndvështrimi i tyre, do të kuptoni se fëmijët janë të ndjeshëm dhe kanë frikë se nëse diçka i ndodh prindit, ata do të mbeten vetëm në këtë botë. Mos harroni t’i drejtoheni Zotit për të gjitha nevojat tuaja dhe, pasi të keni bërë ç’është e mundur, lërini problemet dhe frikërat në duart e Tij të dashura.
- Në rast shkurorëzimi, mos i detyroni fëmijët të zgjedhin anë. Mos i detyroni ata të zgjedhin midis “prindit të mirë dhe prindit të keq”. Fëmijët janë thellësisht besnikë ndaj të dy prindërve dhe ndihen fajtorë nëse duhet të mbështesin njërin kundër tjetrit.
- Mbi të gjitha, jini pozitiv dhe përqendrohuni te Zoti. Mbani mend që prindërit e vetëm me aftësi të mira prindërimi mund të rrisin fëmijë po aq të suksesshëm sa edhe familjet me dy prindër. Kjo arrihet duke ndërtuar një sistem të mirë mbështetës – një rreth miqsh, kushërinjsh dhe fqinjësh. Rritja e fëmijëve të mirë nuk varet nga numri i prindërve, por nga cilësia e prindërimit dhe qëndrimi botëkuptimor i prindit.
Autor: H. Altalib, O. Altalib dhe A. Ebusulejman, 2022
Udhëzues për rritjen e fëmijëve: Marrëdhëniet prind-fëmijë
