ETEA dhe Biblioteka “Hivzi Sylejmani” në Prishtinë janë duke vazhduar me planet rreth aktiviteteve për Panairin e Librit për Fëmijë.
Gjatë këtyre ditëve është planifikuar një program i pasur me aktivitete, ndërsa ceremonia zyrtare e hapjes së Panairit të Librit për Fëmijë u zhvillua më 2 tetor nga ora 12:30, në sheshin “Zahir Pajaziti”. Ky shesh është qendra kryesore e aktiviteteve që po mbahen gjatë gjithë panairit, i cili synon të sjellë përvojë të pasur kulturore dhe arsimore për fëmijët dhe të rinjtë.
Festivali dhe Panairi i Librit për Fëmijë organizohet nga ETEA dhe biblioteka “Hivzi Sulejmani”, me mbështetjen e Zyrës Zvicerane për Bashkëpunim në Kosovë, Ministrisë së Kulturës, Rinisë dhe Sportit, Komunës së Prishtinës, Presidencës së Republikës së Kosovës dhe kompanisë IPKO. Ky panair përbën një mundësi të shkëlqyer për promovimin e leximit, krijimtarisë letrare dhe zhvillimit kulturor ndër fëmijët.
Programi kulturor i Festivalit dhe Panairit të Librit për Fëmijë është zhvilluar në bashkëpunim me institucione dhe organizata të rëndësishme si Dokufest, Teatri Dodona, Bonevet, Terre des Hommes, SOS Fshatrat e Fëmijëve, Galeria Kombëtare e Kosovës, ShFMU “Prenk Jakova”, TOKA, Yoga me Dodona, J Coders, Kosova Makers League, etj. Ndërsa në panair do të marrin pjesë edhe shtëpi botuese të njohura nga Kosova, Shqipëria dhe Maqedonia e Veriut, si Dukagjini, Albas, Magjia e Librit, Galdimi – A Editions, Logos A, Berati, Pegi, Fan Noli, të cilat do të prezantojnë librat dhe projektet e tyre më të fundit.
Panairi pritet të jetë një ngjarje e rëndësishme për kulturën dhe edukimin e të rinjve, duke ofruar mundësi për të zbuluar libra të rinj, për të marrë pjesë në aktivitete interaktive dhe për të ndërtuar lidhje më të ngushta me botën e librit.
Prinderimi.com
