Kjo është një nga ditët më të rëndësishme për fëmijët veçmas për ata që fillojnë klasën e parë këtë ditë. Duke qenë po kaq e rëndësishme për ta, është po aq e rëndësishme për prindërit dhe që mund të jetë po ashtu shumë stresuese për të hapur një kapitull të ri në jetën e fëmijës së tyre. Duke qenë e tillë kjo e ngrit pyetjen se a duhet edhe prindërit ta kenë pushim ditën kur fëmijët e tyre fillojnë klasën e parë.
Në disa vende, prindërit ligjërisht kanë të drejtë ta kërkojnë këtë ditë pushim. Ngjashëm është edhe me Maqedoninë e Veriut që në bazë të nenit 28 të Kontratës së Përgjithshme Kolektive për Sektorin Publik, punonjësi ka të drejtën e një dite pushimi me pagesë për ditën e parë të shkollës së fëmijës së tij. Ministria e Punës dhe Politikës Sociale kishte sqaruar se ky pushim, është në përputhje me kontratën kolektive. Të punësuarit në sektorin privat mund ta ushtrojnë këtë të drejtë vetëm me marrëveshje paraprake nga punëdhënësit. Kjo gjë në Kosovë nuk është e rregulluar akoma, por që prindërit që duan ta kenë këtë ditë apo një pjesë të ditës së lirë duhet ta arrijnë këtë me marrëveshje paraprake me punëdhënësit.
Edhe nëse, siç do të ndodhë për shumë punonjës këtë vit, dita e parë e shkollës bie në ditë pune, mund të vihen në zbatim plane për të marrë pushim nga puna për këtë qëllim. Disa punëdhënës gjithsesi ua lejojnë këtë ditë pushimi prindërve, si përfitim, por edhe nëse nuk është kështu, shpesh është e zbatueshme që të parashtrohet një kërkesë paraprakisht për atë ditë pushimi, diçka që duhet bërë disa ditë përpara, në varësi të llojit të punës në të cilën punonjësi është i angazhuar.
Në raste të tjera, mund të bëhet edhe marrëveshje nga të dyja palët për të lënë 1 shtatorin pjesërisht ose tërësisht ditë të lirë. Pushimi pa pagesë mund të jetë gjithashtu një opsion.
Pse prindërit duhet ta kenë pushim ditën e parë të shkollës?
Dita e parë e shkollës mund të përcillet me shumë shqetësime dhe frikë për fëmijët të cilët nuk kanë një prind te porta e shkollës. Një numër në rritje kompanish tani po u japin punëtorëve një ditë shtesë pushimi me pagesë për t’u siguruar që ata të mos e humbasin këtë moment historik të rëndësishëm. BBC Neës ka biseduar me dy prindër për ndikimin që ka kjo te fëmijët.
Scott Pinner ka thënë se ka qenë “absolutisht fantastike” që të mund ta shoqëronte vajzën e tij, Jessica për në ditën e saj të parë në shkollë në Solihull, West Midlands.
32-vjeçari atë kohë ishte duke punuar për firmën e riparimit Timpson, e cila u ka lënë prindërve një ditë pushimi nëse fëmija i tyre shkon për herë të parë në shkollën fillore ose parashkollorë.
“Ishte e këndshme ta kaloja ditën duke e bërë gati në mëngjes dhe duke e çuar në shkollë”, tha ai.
Shefi ekzekutiv James Timpson tha se 150 punonjës e kishin shfrytëzuar ditën shtesë të pushimit.
“Fillimi i shkollës është një nga ditët më të rëndësishme në jetën e çdo familjeje. Të kesh një ditë shtesë pushimi në portat e shkollës është një përfitim i madh që çdo biznes duhet të ketë në vend”, kishte theksuar ai. / KosovaJo
Kjo e bën dallimin në jetën e një fëmije
Karl Hayward e shfrytëzoi ditën e pushimit për tu marrë me djalin e tij pesëvjeçar, Harlan në shkollën e tij të re. Punëdhënësi i tij nga kompania e sigurimeve Aviva, i jep stafit një gjysmë dite shtesë pushimi për ta dërguar fëmijën e tyre në shkollë ose për ta marrë atë në ditën e parë.
“Kjo bëri një ndryshim të në ditën e parë të Harlanit, duke e ditur se ne nuk duhej të nxitonim në punë menjëherë,” tha ai.
Përkundër që kishin bërë të gjitha përgatitjet një ditë më parë, ai ka shtuar se kjo u kishte ndihmuar jashtëzakonisht shumë për tu ndjerë të relaksuar para ditës së parë të shkollës së djalit të tyre.
“Ne kishim gati gjithçka një natë më parë, por ekziston gjithmonë mundësia e atij paniku të minutës së fundit, nëse këpucët e dikujt nuk janë aty ku i keni lënë ose nëse një çantë është zhdukur në mënyrë misterioze”, kishte shtuar ai.
