Tani, cila është ëndrra jote?
Cila është ajo gjë që ti e dëshiron më shumë se asgjë tjetër në këtë jetë?
Ndoshta ëndrra jote është të fillosh një biznes privat tëndin, ose të udhëtosh rreth botës… ose të shkruash një libër, ose ndoshta të zbulosh mundësitë e një shpikjeje të re, gjë të cilën e ke patur që kur në mendje, por që e ke shtyrë ta vësh në zbatim më vonë…
Ka ide të mëdha që vdesin madje para se të lindin, dhe kjo ndodh për dy arsye kryesore:
Gjëja e parë që i ndalon njerëzit t’i realizojnë ëndrrat e tyre është ajo që quhet “Helmi i ëmbël”. Ky emër më erdhi në mendje kur shkova në kopshtin zoologjik, dhe pashë atje një gjarpër shumë të bukur, ndërsa në tabelën e ngulur mbi shtëpinë e atij gjarpri, shkruhej: “Rrezik”… Nganjëherë habitesh se si një gjë kaq e bukur, të përmbajë këtë lloj helmi vrastar brenda tij.
Ndërsa për sa u përket njerëzve, “helmi i ëmbël” nuk do t’u vijë nga armiqtë e tyre, përkundrazi, helmi i ëmbël atyre u vjen nga njerëzit që i rrethojnë, nga ata që kujdesen për ne si shokët, fqinjët, madje deri edhe anëtarët e familjes. Nganjëherë ata na i shkaktojnë të gjitha shkaqet që çojnë në dështimin e ideve tona, duke futur frikë dhe mosbesim në zemrën tonë, kur imagjinojmë se si ne do të jemi të ekspozuar ndaj talljes dhe përqeshjes së tyre, nëse i vëmë në zbatim idetë që kemi…
Gjithashtu, ndoshta ndokush mundet që t’i kritikojë ëndrrat tona vetëm nga xhelozia që ndjen… Në përgjithësi, ata i kritikojnë ëndrrat tona pothuajse me pavetëdije, duke u mbështetur në parimet dhe besimet e tyre personale, pa marrë parasysh parimet dhe bindjet tona. Pavarësisht se këshillat e tyre dalin me sinqeritet, nga zemra, por ndoshta ato mund të shkaktojnë shumë dëm, pikërisht si helmi vrasës i gjarprit të bukur.
Gjëja e dytë dhe pengesa kryesore që të ndalon për t’i realizuar ëndrrat e tua je ti vetë… Doktor Robert Shuler (Robert Schuller), në librin e tij “Fuqia e mendimeve”, thotë:
“Vendi i vetëm ku ëndrrat e tua bëhen të pamundura, është brenda vetë mendimeve të tua, brenda teje.’
Përgatiti: Prinderimi.com
Autor: Dr. Ibrahim Fekij, “10 çelësat e suksesit”
