Për të krijuar besim, një fëmijë duhet të ndihet i sigurt, si në planin fizik, ashtu edhe në atë ndjesor. Nëse fëmija vuan pasigurinë, nuk ka pikë vlere fakti që i thua se është i bukur apo i sjellshëm. Të gjitha komplimentet që i bëni do të rrëshqasin mbi të ashtu si uji mbi xham.
Fëmija ka nevojë që ju të përcaktoni zakone të qëndrueshme në lidhje me ushqimin, gjumin, përkujdesjen trupore, shëtitjet. Këto zakone bëjnë të mundur që ai të ndihet i sigurt dhe të përcaktojë një pozicion në kohë dhe hapësirë. Nuk ka asgjë më të vështirë për një fëmijë sesa përjetimi i ndryshimeve të shpeshta. Kur puna i detyron prindërit që të kenë orare jo të qëndrueshme, duhet të gjejnë mundësi që, të paktën, të kenë në shtëpi një kujdestare fëmijësh, e cila t’i respektojë ritmet dhe zakonet e përcaktuara.
Një fëmijë ka nevojë për të dy prindërit, por jo gjatë gjithë kohës. Sa më shumë rritet, aq më shumë largohet prej tyre. Megjithatë, nuk mund të ndiejë dashuri dhe siguri, nëse prindërit e tij nuk rrinë në shtëpi aq sa duhet. Lidhja me ta krijohet vetëm me një prani të përditshme.
Duhet të rrimë e të punojmë me fëmijën: të ndajmë me të disa çaste të ditës (zgjimin, ngrënien e vakteve…), të kryejmë së bashku veprimtari të përshtatshme për moshën e tij, t’i organizojmë gjërat që të përjetojë sa më pak ndryshime.
Në lidhje me ndryshimet, duhet ditur se ato u krijojnë ankth edhe të porsalindurve. Fëmija ka nevojë për qëndrueshmëri. Ndërrimi i shpeshtë i vendbanimeve, i kujdestareve apo i çerdheve, ose format e çrregullta të mbajtjes (të tipit dy ditë tek njëri, tri ditë tek tjetri), ndryshimet e papritura të orareve, që të gjitha këto krijojnë pasiguri që dëmton zhvillimin e fëmijës.
Nga ana tjetër, duhet marrë parasysh se ndryshimet janë të pashmangshme. Janë pjesë të domosdoshme të jetës, që një fëmijë të jetë i aftë ta zhvillojë mekanizmin e përshtatjes. Fëmijët që janë rritur të mbrojtur nën një kambanë qelqi, si ata që, për shembull, kurrë nuk e kanë kaluar përvojën e një kujdestareje fëmijësh, do të ndihen shumë të pambrojtur në çastin që do të fillojnë shkollën.
Përgatiti: Prinderimi.com
Autor: Danielle Laporte, “Vetëvlerësimi i fëmijëve 0-6 vjeç”
