Prindërit priren ta marrin të mirëqenë faktin se ajo që ata mendojnë që do t’i bënte ata të lumtur, do t’i bënte të lumtur edhe fëmijët e tyre, por sikurse mund ta keni kuptuar këtë, nuk është kështu. Nëse fëmija juaj duket i palumtur, ju mund të ndiheni sikur keni dështuar, kështu që për të mos e përjetuar këtë ndjenjë të pakëndshme, prireni që t’u impononi fëmijëve tuaj lumturinë, sikurse veproi im atë.
Nëse në kohën që babai im më kundërshtoi, do të kisha dijet e tanishme, do të kisha qenë në gjendje që t’i jepja më shumë kuptim gjendjes sime shpirtërore, por në atë çast, në mendjen time kishte vetëm mjegull dhe paqartësi. Është hutimi që provon kur kupton se ndien diçka, por dikush tjetër përpiqet të të bindë që nuk e ndien atë emocion. Dhe në atë turbullirë hutuese, përjetova gjithashtu edhe turp, për shkak se kuptova që kisha bërë diçka shumë të gabuar (edhe pse kurrë nuk u qartësova se çfarë).
Babai humbi mundësinë për të krijuar një lidhje me mua, ndoshta jo në atë çast, por pas largimit të mikut. Ai mund të më kishte pyetur se çfarë ndieja dhe jo të përgjigjej për mua, sido që të ishte perceptuar përgjigjja ime, edhe nëse dukej si një sulm kun- drejt tij. Ai mund të më kishte ndihmuar që ta artikuloja atë ndje- një dhe të përpiqej ta shikonte botën sipas këndvështrimit tim. Nuk jam duke thënë që ai duhet të kishte ndryshuar pikëpamjen e tij për botën, por mund të përpiqej që të zbulonte këndvësh- trimin tim për të konceptuar botën dhe veten.
Nëse ju e konsideroni trishtimin, irritimin apo frikën e fëmijës suaj, jo si ndjenja negative që duhen korrigjuar, por si një mundësi për të mësuar më shumë rreth tyre dhe për të krijuar lidhje me ta, atëherë do të jeni në gjendje që ta thelloni më shumë lidhjen me fëmijët tuaj. Pastaj, në këtë mënyrë do të krijoni terrenin për të zhvilluar aftësinë e tyre për të qenë të lumtur.
Përgatiti: Prinderimi.com
Autor: Philippa Perry, “Libri që do të dëshironit të lexonin prindërit tuaj”
