Siç dihet, dy faktorë që e kontrollojnë jetën tonë janë trashëgimia dhe mjedisi. Sa i përket trashëgimisë, ajo përcakton shumë nga tiparet tona të personalitetit, në nivelin fizik, në atë intelektual, si dhe në shumë aspekte të tjera. Sa i përket mjedisit, ai është elementi kryesor dhe efektiv që formëson dëshirat, qëndrimet dhe talentet tona.
Nga mjedisi ne mësojmë kriterin për atë që është e mirë dhe atë që është e keqe dhe për vlerat e virtytit dhe antivlerat e së keqes. Mjedisi është gjithashtu përgjegjës për mënyrën si i rendisim prioritetet e jetës personale. Nuk e teprojmë nëse themi: nga faktorët që ndikojnë në të arriturat dhe dështimet e njerëzve, 40% janë të trashëguara dhe 60% janë nga mjedisi.
Nga kjo mund të kuptojmë rëndësinë që disa familje i kanë kushtuar gjetjes së vendit më të mirë për edukimin e fëmijëve. Shpesh ndodh që qytetet ofrojnë kushte më të mira për edukim, sepse aty ndodhen shkollat dhe akademitë më të mira, si dhe mësuesit dhe profesorët më të mirë.
Është e vërtetë se emigrimi është shumë i kushtueshëm. Mirëpo, familje të shumta gjithmonë kanë pranuar të sakrifikojnë dhe janë të gatshëm të kapërcejnë vështirësitë për hir të edukimit të fëmijëve dhe përgatitjen e tyre për përgjegjësitë e jetës.
Pas kësaj hyrjeje, ne mund të vazhdojmë të eksplorojmë më tej mjedisin, i cili është faktor kyç në ngulitjen e qëndrimit pozitiv të fëmijëve për të mësuar. Gjëja e parë që e vërejmë në këtë aspekt është se nuk kemi vetëm një mjedis të vetëm.
Ekziston mjedisi familjar, mjedisi i shkollës dhe mjedisi i përgjithshëm. Secilin nga këto mjedise do ta tregoj në vijim si një temë të ndarë.
Përgatiti: Prinderimi.com
Autor: Dr. Abdulkerim Bekkar, ”Fëmija lexon”
