Në secilin rast, sjellja agresive mund të manifestohet në këto mënyra:
Agresiviteti fizik
Agresiviteti fizik manifestohet në formën e dëmtimit fizik të një fëmije tjetër ose të një të rrituri. Ky agresivitet mund të marrë formën e goditjes, gërvishtjes së fytyrës, kafshimit, shkelmimit ose shtyrjes së dhunshme. Agresori mund të shkojë edhe më larg duke sulmuar me një gjësend të mprehtë ose një armë, shpesh dëgjojmë se si nxënësit amerikanë i sulmojnë mësuesit ose shokët me armë zjarri.
Agresiviteti gojor
Siç tregohet nga titulli, agresiviteti gojor kufizohet në shqiptimin e fjalëve të sharjes, shpifjes ose ofendimit me fjalë si “budalla”, “kokëtrashë”, “rrugaç”; fatkeqësisht shprehje të tilla dhe më të këqija se këto janë të përhapura me të madhe në kulturat injorante, të nënprivilegjuara dhe të varfra.
Një nënë e tregon rastin e saj me fjalët: “Pata fatin të martohesha me një njeri nga një vend që dallonte prej vendit tim. E pëlqeva dhe u martova me të me plot bindje. Mirëpo, kur pas një kohe të martesës, u shpërngulëm në qytetin e tij, u zhgënjeva plotësisht. Vendlindja e tij dallonte shumë prej tij. Familja e tij e ngushtë dhe e gjerë dhe fqinjët ishin shumë të prapambetur.
Për një muaj dëgjova aq shumë fjalë të fëlliqura që nuk e imagjinoja dot se mund t’i thoshte ndonjë njeri. Natyrisht se bashkëshorti im dallonte nga familja e tij, mirëpo ishte e tmerrshme se çfarë do të mësonin fëmijët nga kushërirët e tyre. Në të vërtetë fillova të dëgjoja fëmijët duke thënë fjalë që ishin goditje për mua. Kaloja net pa gjumë, duke menduar për një zgjidhje. Nuk gjeja zgjidhje tjetër përveç që të shpërnguleshim në një vend tjetër.
Mirëpo kur fola me bashkë- shortin tim, ai insistoi që të jetonim në mesin e familjes së tij. Isha në udhëkryq, kështu ju luta Allahut të më udhëzonte se çfarë të bëja. E konsultova babanë dhe pastaj bëra diçka që nuk ishte më e vogël se një aventurë e rrezikshme. I thashë bashkëshortit: “E ke një muaj kohë dhe hiq më tepër, të vendosësh: ose të shpërngulesh ose të divorcohesh prej meje.”
Për bashkëshortin tim ishte një befasi e madhe, mirëpo isha shumë e vendostë. Kështu ai u deshtë të lëshonte pe dhe ne u shpërngulëm në një vend tjetër. Atje njerëzit ishin ndryshe dhe brenda dhjetë muajve e ndjeva dallimin e madh. Tani kanë kaluar dhjetë vjet nga kjo përvojë, ndërsa bashkëshorti shpesh më thotë: “Sigurisht se për shkak të guximit tënd të jashtëzakonshëm fëmijët na shpëtuan nga pasojat e mëdha, mund të marrësh me mend se si do të bëheshin.”
Një aspekt i agresivitetit gojor që duhet të përmendim këtu është bërtitja dhe kërcënimi dhe gjithashtu çdo lloj i terrorizimit të të tjerëve.
Agresioni simbolik
Në këtë lloj të agresionit nuk ka as goditje me dorë, e as ofendim me gjuhë. Ai shprehet me sjellje dhe qëndrime, si për shembull një fëmijë refuzon të përshëndes fëmijën tjetër, të flas me të, të ulet pranë tij. Ai i shikon fëmijët tjerë me përbuzje ose flet gjepura për të tjerët. Të gjitha praktikat e tilla janë rezultat i përbuzjes së të tjerëve, ngritjes mbi ta dhe nënçmimit të tyre. Ky lloj i agresivitetit është shumë lëndues.
Ai mund të jetë më lëndues sesa sulmi fizik. Ai vërtet reflekton qëndrimin racist ose mendjemadhësinë me statusin e tij ose madje një karakter paranoid. Shpesh ndodh që agresioni simbolik të jetë një sjellje e përgjithshme e familjes në të cilën është rritur fëmija.
