Periudha që përfshin afërsisht një vit nga lindja e fëmijës deri te momenti kur ai fillon të zvarritet dhe të ecë, quhet “foshnjëri”. Ky vit i parë është ndër periudhat më të rëndësishme në jetën e një fëmije, pasi gjatë tij formohen bazat e ndjenjave themelore për vetveten dhe për mjedisin që e rrethon.
Nëse gjatë kësaj kohe i plotësojmë nevojat e foshnjës me kujdes dhe dashuri – e ushqejmë kur ka uri, e mbajmë afër, e ngushëllojmë kur qan – atëherë ai do të ndihet i sigurt dhe i mirëpritur në këtë botë. Në këtë mënyrë, fëmija fillon të zhvillojë ndjenjën e besimit ndaj të tjerëve dhe vetvetes.
Krijimi i një lidhjeje të fortë emocionale mes prindit dhe foshnjës është themelor. Ky lidhje mund të arrihet duke e ushqyer me qumësht gjiri, duke e përqafuar, duke folur dhe kënduar për të, duke ia ndërruar pelenat me kujdes, duke e larë dhe duke ia plotësuar të gjitha nevojat bazë.
Një foshnjë që ndihet e dashur dhe e mbrojtur e përqafon botën me kuriozitet. Çdo ditë për të është një aventurë e re: fytyra të panjohura, zhurma të reja, shije të panjohura, vende të reja dhe fëmijë të tjerë me të cilët mund të luajë. Megjithatë, kjo botë e mrekullueshme mund të jetë edhe e mbushur me rreziqe.
Edhe një foshnjë e porsalindur është një qenie e ndjeshme dhe inteligjente që mund të krijojë lidhje të thella emocionale. Ajo përgjigjet ndaj fjalëve të ëmbla dhe ledhatimeve të prindërve, duke ndërtuar një marrëdhënie harmonike që nga fillimi. Foshnja percepton çdo emocion të prindërve, ndjen mendimet e tyre dhe vëren thellësinë e dashurisë që i dhurohet.
Fëmijët që rriten në një mjedis të mbushur me dashuri, kujdes dhe ngrohtësi fitojnë aftësinë për të përballuar shqetësimet dhe frikën normale të jetës, duke e ditur se gjithmonë mund të mbështeten te prindërit për siguri. Përkundrazi, fëmijët që rriten në neglizhencë ose dhunë shpesh zhvillojnë një mungesë ndjeshmërie ndaj rreziqeve.
Çdo fëmijë është unik dhe i veçantë
Fëmijët kanë karakteristika dhe ritme të ndryshme zhvillimi. Edhe pse ndryshojnë nga njëri-tjetri, të gjithë ndajnë një cilësi të përbashkët: janë të ëmbël, të lumtur dhe të etur për të eksploruar botën që i rrethon. Kjo kureshtje dhe dashuri për jetën i bën ata të jashtëzakonshëm dhe të çmuar për prindërit e tyre.
Autor: Dr. Sajgëllë, ”Psikologjia e fëmijëve 0-7 vjeç”
Përgatiti: Perparim Blakaj, Prinderimi.com
*Klikoni KËTU për t´u bërë pjesë e kanalit zyrtar të Rrjetit të Prindërve të Kosovës në Viber.
