Ne të gjithë e shohim se sa shumë është avancuar bota në sferën e formave dhe ngjyrave mbresëlënëse. Vërtet të mahnit ajo që sot e gjemë në treg nga gjërat luksoze dhe të bukura. Shumëllojshmëria e bukurisë së tyre të vë në dilemë se cilën ta zgjedhësh. Nga kjo e kuptojmë se pse është vështirë të kënaqen fëmijët në këtë kohë. Ata nuk i tërheq një libër dhe nuk u pëlqen leximi i tij nëse nuk është sipas shijes së tyre. Prandaj, prindërit dhe edukatorët duhet të jenë të qartë sa i përket kritereve që përcaktojnë se çka e përbën një libër të mirë dhe pastaj duhet t’u sqarojmë fëmijëve dhe adoleshentëve tanë.
Një botues ka thënë: “Ashtu sikur që fëmija nuk vrapon dhe luan me qëllim të forcimit të muskujve, mirëpo për argëtim, ai nuk lexon për të përfituar prej leximit, mirëpo për t’u argëtuar. Ky konstatim tregon rëndësinë e zgjedhjes së librit atraktivë.” Ai shton: “Kam marrë pjesë në tri panaire të librit, në Kajro, Tunis dhe Shergja dhe e kam bërë një eksperiment. Në panair kam dalë me tri koleksione të ndryshme të librave: libra të pazbukuruar, libra mesatarisht të zbukuruar dhe libra me dizajn të bukur, letër dhe kualitet të lartë.
Natyrisht se librat e fundit kishin çmim të lartë, ndërsa të pazbuku- ruarat kishin çmim të ulët. Pastaj vura re se fëmijët i zgjidhnin librat elegant dhe të zbukuruar pa pyetur për çmimin e lartë. Fakti se duhej të paguanin shumë më tepër, nuk pengonte që fëmijët të vendosnin t’i blinin ato libra. Për ta libri ishte i mirë dhe kaq.
Nga ajo që e kam vënë re, të rriturit sillen mjaft ngjashëm. Ata janë të përgatitur të paguajnë mirë për një libër elegant dhe tërheqës. Libri i mirë është ai që është i mirë në dukje, dimensione, ilustrime dhe ngjyra. Libri i mirë është ai që i përshtatet moshës së fëmijëve. Një fëmijë tetë vjeçar nuk do të kënaqet me një libër të shkruar për një dymbëdhjetë vjeçar. Edhe librat islame për fëmijë duhet t’i përmbajnë këto karakteristika të librit të mirë.
Ato duhet të mbjellin te fëmija vlerat e mëdha të Islamit, si: besimi, besnikëria, bamirësia, përkushtimi dhe bujaria. Fatkeqësisht shumë libra për fëmijë janë të ngarkuar me predikim direkt, një gjë që ngjall mospëlqim te fëmija.
Një gjë tjetër që duhet ta kemi parasysh është se sa më i vogël të jetë fëmija, aq më të mëdha dhe më lehtë të dallueshme duhet të jenë shkronjat e librit ose tregimit. Po ashtu edhe zbrazëtira midis paragrafëve duhet të jetë më e gjerë që ti mundësohet fëmijës një pushim midis tyre. Po ashtu është e nënkuptuar sesa më i vogël të jetë fëmija, aq më pak fjalë duhet të përmbajë një faqe. Pjesa tjetër e faqes duhet të jetë e mbushur me piktura me ngjyra.
Dikush mund të pyes: Çfarë përmbajtje duhet të ketë libri ose tregimi? Çfarë i përshtatet fëmijës?
Konstatimi im është se elementet themelore të të gjitha librave janë kopertina, hyrja, përfundimi, struktura e librit dhe tabela e përmbajtjes. Prandaj për të zgjedhur librin e duhur duhet të fillojmë me kopertinën, të lexojmë titullin dhe emrin e autorit, botuesin dhe datën e botimit.
Ka shkrimtarë të suksesshëm të librave për fëmijë, andaj duhet t’i blejmë librat e tyre. Data e botimit gjithashtu ka rëndësi. Meqenëse teknologjia çdo ditë po avancon, një libër i botuar më herët ka informacione të vjetra, ndërsa gjërat kanë përparuar shumë. Është ide e mirë të lexohet përmbajtja dhe t’i hidhet një shikim librit, nëntitujve dhe paragrafëve për të pasur një pasqyrë të librit. Natyrisht se ne duhet t’i trajnojmë fëmijët në zgjedhjen e librave, duke ua përmendur kriteret e lartpërmendura. Pastaj duhet t’i kushtojmë vëmendje gjetjes së librit, i cili do ta tërheq fëmijën dhe të cilin do ta preferojë para lojës.
Prandaj, kur të shkojmë në një librari, mund të marrim një numër të librave dhe t’i vendosim para fëmijës. Fëmija duhet të ketë mjaft kohë për t’i shikuar të gjithë librat dhe librin që e zgjedh duhet t’ia blini sepse është e padobishme t’i blini një libër që nuk e pëlqen, edhe nëse të rriturit mendojnë se është i mirë. Mënyrat për të tërhequr fëmijën në lexim janë të panumërta, mirëpo shpresoj se i kam shpjeguar disa nga mënyrat më të mira për të arritur këtë qëllim; ato do të mjaftojnë për ata që janë seriozë. Le të punojmë me zell dhe le t’i lutemi Allahut për sukses.
