Periudha e fëmijërisë së hershme (1 deri në 3 vjeç)
Gjatë kësaj faze, është domosdoshmërisht të fillohet me përdorimin e brushës si pjesë e rutinës ditore në higjienën orale, nëse kjo nuk ka filluar më herët. Aplikimi i pastës duhet të bëhet në sasi të vogla, sa madhësia e një kokrre orizi, pasi fëmijët në këtë moshë kanë vështirësi të nxjerrin jashtë sasitë e tepërta të pastës dhe rrjedhimisht e gëlltitin atë, duke marrë sasi më të mëdha të fluorit se sa vlerat normale.
Përveç brushës, në këtë periudhë nuk ka nevojë për elemente tjera shtesë në mbajtjen e higjienës.
Është një fazë kur fëmija tenton të imitojë veprimet që ndodhin përreth tij, dhe kjo ndodh edhe kur prindërit pastrojnë dhëmbët; atëherë edhe fëmijët bëjnë të njëjtat veprime dhe kështu e praktikojnë me lehtësi pastrimin e dhëmbëve.
Prindi mbetet kujdestari kryesor gjatë procedurave higjienike, edhe pse fëmijët kënaqen duke i pastruar vetë dhëmbët dhe krijojnë rezistencë ndaj lejimit të dikujt tjetër që t’ua pastrojë dhëmbët.
Pozicioni i fëmijës dhe i prindit është shumë i rëndësishëm. Kur janë të dy prindërit, atëherë mund ta ulin fëmijën në prehër; njëri prind i kontrollon lëvizjet e fëmijës dhe i lejon prindit tjetër që të pastron dhëmbët. Prindërit duhet ta gjejnë momentin e duhur kur fëmija është i relaksuar dhe ta motivojnë atë që t’i pastrojë dhëmbët.
Periudha e fëmijëve parashkollorë (3 deri 6 vjeç)
Fëmijët e kësaj moshe veç se i kanë të zhvilluara aftësitë në përdorimin e brushës për pastrimin e dhëmbëve, por ende vazhdon të mbetet si proces të cilin duhet t’a monitorojë prindi dhe në raste të caktuara edhe të ketë rol ndihmës gjatë këtyre procedura.
Sasia e pastës për këtë grupmoshë duhet të jetë sa madhësia e kokrrës së bizeles.
Nëse ka filluar mbyllja e hapësirave interproksimale (hapësirat në mes të dhëmbëve fqinjë), atëherë indikohet edhe përdorimi i perit interdental.
Autore: Dr. Marigona Gashi, Prinderimi.com
