Shkolla “Zenel Hajdini” u ka dërguar prindërve një marrëveshje, në të cilën theksohet se institucioni nuk mban përgjegjësi për lëndimet apo sëmundjet që nxënësit mund të pësojnë gjatë aktiviteteve të detyrueshme ose vullnetare të shkollës, raporton Prinderimi.com
”Kur Nxënësi merr pjesë në një ngjarje apo aktivitet rreth Shkollës, qoftë i detyrueshëm apo volunter, Shkolla nuk do të jetë përgjegjëse për ndonjë lëndim apo sëmundje, qoftë fizike apo mendore, apo humbje të gjësendeve, të pësuar nga Nxënësi, gjatë apo për shkak të atij participimi’‘– thuhet në marrëveshjen që u është dërguar prindërve.
Prindërit kanë dalë kundër kësaj marrëveshje duke theksuar se dokumenti nuk reflekton atë që mund të pritet nga institucionet arsimore sa i përket përgjegjësive të tyre. Ata thonë se kjo marrëveshje është imponuese dhe e përjashton shkollën ”Zenel Hajdini” nga çdo lloj përgjegjësie, edhe në raste të aktiviteteve të detyrueshme, që mund të ngrejë pikëpyetje për sigurinë dhe kujdesin që duhet të ofrohet gjatë aktiviteteve shkollore.
”Çka nëse fëmija im që është në klasën e tretë, lëndohet në aktivitetet e shkolles? Unë duhet të marrë përgjegjësi edhe pse s’jam prezente? Ata e marrin me detyrim ne aktivitet edhe nuk dojne me marr pergjegjesi. Nëse shkolla nuk merr përgjegjësi, atehere kush duhet, Komuna? Policia? Shteti?” – tha L.S, nëna e njërit nga nxënësit që ka refuzuar nënshkrimin e marrëveshjes.
”Shkolla jone duhet me pas hapesire per gjerat e humbura, dhe ka kujdestar te klases, te dites, drejtor, kamera te sigurise…dhe mundet me u perdor edhe policia nese vjedhja eshte ne vlere mbi 50€. Keshtu e dijme ne..” – thotë A.D, një tjetër prind i shqetësuar për situatën.
Sipas studimeve, hulumtimeve dhe anketave të shumta, shkollat në Komunën e Prishtinës nuk ofrojnë ambient e as sistem mjaftueshëm të sigurt për zhvillimin e qëndrueshëm të nxënësve dhe stafit arsimor. Gjatë vizitave të ndryshme në shkolla nga Drejtorja e Arsimit, znj. Musmurati dhe zyrtarë tjerë nga DKA, nxënësit, mësimdhënësit dhe drejtorët e shkollave kanë shprehur vazhdimisht se siguria në shkolla është një problem thelbësor në Prishtinë. Sipas raportit të OSBE-së dhe Policisë së Kosovës për sigurinë në shkollat e Prishtinës, rreth 23.5% e nxënësve të klasave 6-12 deklarojnë se nuk ndihen aq të sigurt apo të pasigurt në shkollat e tyre.
Duke marrë parasysh të gjithë indikatorët shqetësues të lartcekur, Komuna e Prishtinës ka vendosur që sigurinë e nxënësve ta bëjë prioritet dhe ta trajtojë atë me urgjencë, duke hartuar Planin e Veprimit për Siguri në Shkolla 2023-2026
Në dokumentin e hartuar thuhet qartë se: ”Të gjitha shkollat në Prishtinë do të pajisen me kamera të sigurisë, ndriçim efektiv, rrethoja të oborrit dhe sigurim fizik. Gjithashtu, për të garantuar gjithëpërfshirje të sigurt të personave me aftësi të kufizuara, ne synojmë të vendosim pjerrina dhe/ose ashensorë në të gjitha institucionet shkollore.”
”Duke qenë se shkollat mund t’i ekspozohen rasteve emergjente, planifikojmë që t’i pajisim shkollat me kuti të ndihmës së parë, shkallë emergjente, sinjalizim dhe hartë të evakuimit. Secila shkollë do të hartojë planet e veta të emergjencës dhe me përkrahjen e institucioneve të sigurisë do të bëjnë simulime të tyre”
Shkolla ka për detyrë të sigurojë një ambient të sigurt për nxënësit, duke përfshirë edhe aktivitete jashtë mësimore. Nëse ndonjë nxënës pëson lëndime ose përjeton ndonjë dëm psikologjik gjatë një aktiviteti të organizuar nga shkolla, përgjegjësia shpesh bie mbi shkollën për t’u siguruar që masat e duhura të sigurisë dhe kujdesit janë zbatuar. /Prinderimi.com
