Kur fëmija juaj ka temperaturë gjatë natës, mund të keni disa pyetje se si të kujdeseni për të. Ne kemi përgatitur një udhëzues të dobishëm për ju.
Në këtë artikull mund të gjeni:
Çfarë janë ethet?
Si ta ndihmoni fëmijën tuaj të përballojë ethet?
A duhet ta zgjoni fëmijën tuaj nëse ka ethe?
Kur të kontaktoni një ofrues të kujdesit shëndetësor?
Nëse jeni prind i një foshnjeje ose një vogëlushi, ky mund të jetë një skenar i njohur: Një ftohje ose grip i fortë e ka lënë fëmijën tuaj të digjet me temperaturë gjatë gjithë ditës. Një ofrues i kujdesit shëndetësor ju ka siguruar se me pak dashuri dhe ndoshta disa ilaçe për uljen e etheve, temperatura do të kthehet në normale sapo të largohet infeksioni.
Megjithatë, tani që është koha e gjumit, është e natyrshme të keni disa pyetje. A duhet ta zgjoj fëmijën tim për të kontrolluar ethet e tij? Si ta vesh atë?
Më poshtë, do të mësoni më shumë se si të menaxhoni ethet e fëmijës suaj gjatë natës dhe kur është koha për të kërkuar kujdes mjekësor shtesë.
Çfarë janë ethet tek fëmijët?
Kur bëhet fjalë për ethet dhe fëmijët, profesionistët e shëndetit konsiderojnë çdo temperaturë më të lartë se 38.0°C si ethe, ndërsa temperatura “normale” e trupit është 37.0°C. Është e rëndësishme të mbani mend se ethet nuk janë një sëmundje në vetvete, por një simptomë. Tek foshnjat dhe të vegjlit, ethet shpesh shoqërojnë sëmundje të zakonshme virale dhe bakteriale, si gripi, ftohja, gastroenteriti, infeksionet e veshit, bronkioliti dhe infeksionet e traktit urinar.
Sado shqetësuese të jenë ethet, përpiquni të mbani mend se ato janë një pjesë normale e përgjigjes imune të trupit. Ato shërbejnë si një mekanizëm mbrojtës duke stimuluar prodhimin e qelizave të bardha të gjakut (të tilla si limfocitet e qelizave T) që synojnë, kontrollojnë dhe neutralizojnë në mënyrë aktive infeksionet.
Si ta ndihmoni fëmijën tuaj të përballojë ethet gjatë natës?
Kur fëmija juaj ka temperaturë të lartë, mund të ndiheni të shqetësuar për mirëqenien e tij. Një temperaturë më e ulët se 38.9°C zakonisht nuk kërkon trajtim, por nëse ajo tejkalon këtë vlerë, është e rëndësishme të merrni masa për ta lehtësuar situatën, veçanërisht nëse fëmija juaj nuk ndjehet rehat.
Për këtë arsye, Akademia Amerikane e Pediatrisë (AAP) rekomandon disa hapa për të menaxhuar ethet e fëmijës suaj:
- Mbajeni fëmijën tuaj të hidratuar: Temperatura e lartë mund të shkaktojë humbje të shpejtë të lëngjeve dhe dehidrim, çka mund të çojë në komplikime serioze. Sigurohuni që fëmija juaj të pijë shpesh gjatë ditës dhe para gjumit. Uji është alternativa më e mirë, por për fëmijët më të mëdhenj mund të ofroni lëngje ose një zgjidhje për rihidratim oral. Nëse ushqeni me gji, ofroni gji më shpesh, pasi qumështi i gjirit ofron antitrupa që ndihmojnë fëmijën të luftojë infeksionin.
- Përdorni reduktues të temperaturës kur është e nevojshme: Nëse ethet e fëmijës po shkaktojnë shqetësim, mund të përdorni ilaçe si Tylenol (acetaminophen) për fëmijë ose Motrin/Advil (ibuprofen) për të ulur temperaturën. Këto ilaçe mund të jenë veçanërisht të dobishme para gjumit, nëse fëmija ka vështirësi për të fjetur.
Megjithatë, është e rëndësishme të kontrolloni informacionin mbi dozimin në etiketë dhe të konsultoheni me një ofrues të kujdesit shëndetësor nëse keni pyetje. Acetaminofeni mund të përdoret te fëmijët deri në 2 muajsh, ndërsa ibuprofeni rekomandohet vetëm për ata që janë 6 muajsh e lart. Nëse fëmija juaj është më i vogël se 3 muajsh ose nëse nuk jeni të sigurt për dozën, flisni me një farmacist, pediatër ose ofrues të kujdesit shëndetësor përpara se të jepni ndonjë ilaç.
Shënim mbi përdorimin e aspirinës dhe mënyrën e veshjes së fëmijëve
Asnjëherë nuk duhet t’i jepni aspirinë një fëmije, përveç nëse jeni nën udhëzimin e qartë të mjekut të fëmijës tuaj. Përdorimi i aspirinës tek fëmijët me infeksione virale është i lidhur me sindromën Reye, një gjendje e rrallë, por potencialisht kërcënuese për jetën.
Veshja e fëmijës gjatë natës
Është e rëndësishme ta vishni lehtë fëmijën tuaj kur ai ka ethe. Ndërsa instinkti juaj mund të jetë ta mbuloni fëmijën me rroba të ngrohta, kjo mund ta rrisë shqetësimin e tij. Zgjidhni pëlhura të lehta dhe që marrin frymë, si pambuku. Nëse fëmija juaj preferon të flejë me pizhame, zgjidhni ato me mëngë të shkurtra dhe pantallona të shkurtra.
Sigurohuni gjithashtu që dhoma e fëmijës të ketë një temperaturë të rehatshme për gjumë (rreth 23-24 gradë).
Lexo poashtu: https://prinderimi.com/si-ndikojne-temperatura-e-larta-ne-semundjet-e-zemres-dhe-si-te-parandalohen-demtimet/
A mund t’ja ulë temperaturën nëse e pastroj fëmijën tim në banjë?
Kur fëmija juaj ka temperaturë, është normale të shqetësoheni. Megjithatë, nëse ai është në gjendje të flejë, mos e zgjoni vetëm për të matur temperaturën ose për t’i dhënë ilaçe kundër etheve. Një gjumë i mirë është më i rëndësishëm për procesin e shërimit sesa monitorimi i temperaturës së tij, përveçse nëse simptomat janë aq të rënda sa kërkojnë vizitën në urgjencë.
Megjithatë, ka disa përjashtime nga ky rregull. Nëse fëmija juaj është duke fjetur i shqetësuar, mund të jetë e dobishme t’i jepni një dozë të Tylenol, Motrin ose Advil para gjumit për ta ndihmuar të pushojë më mirë. Po ashtu, nëse fëmija juaj po merr frymë më shpejt se normalisht ose në mënyrë të parregullt, është e rëndësishme të kontrolloni temperaturën e tij për të përcaktuar nëse nevojiten veprime të mëtejshme.
Kur duhet të kontaktoni një doktor?
Në shumicën e rasteve, ethet mund të menaxhohen në shtëpi me kujdes mbështetës dhe reduktues të temperaturës. Megjithatë, ka raste kur është e domosdoshme të kontaktoni një ofrues të kujdesit shëndetësor ose të vizitoni një institucion të kujdesit në mënyrë urgjente. Ja disa situata kur duhet të kërkoni ndihmë profesionale:
- Kur fëmija juaj është 2 muajsh ose më i vogël – dhe ka një temperaturë prej 38°C, ose më shumë. Çdo ethe tek një i porsalindur konsiderohet urgjencë. °C
- Kur fëmija juaj është 3 deri në 6 muajsh – dhe ka një temperaturë prej 38,3°C ose më shumë.
- Kur fëmija juaj është mbi 6 muaj – dhe ka pasur një temperaturë prej 38.9°C ose më të lartë për më shumë se dy ditë.
- Kur fëmija juaj ka shenja të shqetësimit, si duar dhe këmbë që dridhen, probleme me frymëmarrjen, ose sytë që kthehen prapa. Këto janë shenja të një krize febrile. Edhe pse shumica janë relativisht të padëmshme, ato që përsëriten ose zgjasin më shumë se 10 minuta duhet të shqyrtohen menjëherë.
- Kur keni vështirësi ta zgjoni fëmijën.
- Kur fëmija juaj është nën 2 vjeç – dhe ka pasur një temperaturë prej të paktën 40.1°C për më shumë se 24 orë.
- Kur fëmija juaj është mbi 2 vjeç – dhe ka pasur një temperaturë prej të paktën 40.1°C për më shumë se 72 orë.
Është e natyrshme të ndiheni të shqetësuar kur fëmija juaj ka ethe. Kjo është arsyeja pse duhet të ndiheni të lirë të kontaktoni një pediatër ose ofrues të kujdesit shëndetësor për çdo pyetje që mund të keni, pavarësisht nga temperatura e fëmijës ose sa kohë ai ka ethe. Ethet mund të jenë stresuese për prindërit dhe fëmijët, dhe kërkimi i këshillës nga një profesionist mjekësor shpesh është hapi i duhur për t’u ndier më mirë dhe për të qenë të sigurt në vendimet tuaja për kujdesin e fëmijës tuaj.
Autor: Dr. Vincent Lannelli
Përktheu dhe përshtati: Perparim Blakaj
