Problemi i druajtjes sikur shumë probleme të fëmijëve ka zgjidhje, nëse prindërit dinë si të merren me të. Megjithatë, ai mund të intensifikohet dhe të përkeqësohet. Mund të lëshojë rrënjë në karakterin e fëmijës; madje edhe pasi të rritet, ai mund ta pengojë atë të çojë një jetë normale dhe të lumtur. Ngurrimi gjithashtu mund të bëhet barrierë për progresin e fëmijës në shkollë dhe më vonë kur ai të fillojë një profesion si i ri.
“Gjëja themelore është që të mos e zmadhojmë tej mase problemin, sepse në atë rast do të mendojmë si të pamundur për ta zgjidhur. As nuk duhet ta neglizhojmë derisa të përkeqësohet dhe të bëhet i pazgjidhshëm.”
Më poshtë i kam përmbledhur disa sugjerime që na ndihmojnë me një fëmijë të druajtur:
1. Gjëja e parë që duhet të bëjmë është të shikojmë mirë sjelljen e fëmijës dhe rrethanat e një fëmijë të druajtur. Sa i përket të men- duarit dhe ndjenjave të fëmijës duhet të kemi parasysh se druajtja nuk është bërë tipar i fëmijës pa ndikimin e besimeve të caktuara lidhur me gjërat që e rrethojnë. Nëse fëmija për shembull turpërohet të ulet me vizitorë për shkak se nuk di si ti përshëndes, ne ua mësojmë disa fjalë përshëndetëse kur t’i pret dhe kur t’i përcjell mysafirët dhe disa gjëra që mund t’i thonë në bisedë me ta.
Nëse fëmija është i turpshëm për t’i pyetur mësuesit, për shkak të ndonjë problemi në të folur, ne duhet ta trajtojmë atë problem dhe duhet ta trajnojmë fëmijën ta shpërfill atë, e kështu me radhë. Sa u përket gjërave rreth fëmijës, gjëja kryesore është shikimi i atmosferës brenda familjes. Familja mund të teprojë në llastimin e fëmijës ose mund të jetë tepër e ashpër në qortimin e tij ose ta neglizhojë atë. Në të gjitha këto raste është e domosdoshme të kapërcejmë problemin duke i tharë burimet e tij.
2. Inkurajimi i fëmijës për t’u angazhuar në aktivitete shoqërore. Bëni mirë ta inkurajoni fëmijën të marrë pjesë në aktivitete shoqërore në shkollë, për shembull të marrë pjesë në recitale, në sporte dhe në klube shkencore. Inkurajimi i tij për të marrë pjesë në lojëra me dy ose tre fëmijë dhe shpërblimi i tij për të arriturat.
3. Mbroje nga gjuha poshtëruese. Mos lejo askënd në familje ta thërret fëmijën me emra të këqij, sepse mund të mbjellë druajtjen në mendjen tij. Për shembull, të thirret me emra si ‘belban, ngelaq, kokëtrashë. Përsëritja e fjalëve si këto, do të mbjellë te fëmija mesazhin e atyre fjalëve dhe ata do të fillojnë të besojnë se janë ashtu siç përshkruhen dhe do të sillen në pajtim me ta.
4. Trajnimi i tij për të praktikuar lidershpin dhe për të marrë iniciativa. Disa familje bëjnë një gjë të mirë kur mbajnë takime çdo dy javë gjatë të cilave fëmijët mbajnë fjalime, recitojnë poezi me përmbajtje fisnike, ose debatojnë çështje që janë jetike për familjen. Më kujtohet një debat i bukur midis dy bijve, njëri e mbronte misvakun dhe dobitë e tij, ndërsa tjetri e mbronte cigaren dhe dobitë e saj. Natyrisht se mbrojtësi i misvakut ishte ai që triumfoi.
5. Të besuarit e përgjegjësive. Lëre fëmijën të lirë të kontaktojë me shokët dhe të afërmit, jepi detyra si blerja e gjërave për shtëpi, kështu që të përzihet me njerëz, të mësojë të negociojë dhe të kërkoj çmime më të ulëta. Aktivitetet e tilla mund t’i ndihmojnë ta thyejnë barrierën e druajtjes për të folur me njerëz.
Përgatiti: Prinderimi.com
Autor: Prof. Dr. Abdul Kerim Bekkar, “Problemet e fëmijëve”
