Pse fëmijët tanë na prekin kaq shumë emocionalisht?
Prindërimi ka shumë shtresa. Tashmë e dini se ai nuk lidhet vetëm me mënyrën se si zgjidhni t’i rrisni fëmijët tuaj, mësimet që dëshironi t’u mësoni apo mjetet që dëshironi t’u ofroni atyre.
Ai lidhet gjithashtu me mënyrën se si menaxhojmë atë që ndodh brenda nesh.
Prandaj, një shpërthim zemërimi i një vogëlushi për shkak të ngjyrës së gabuar të pipëzës mund të ndihet si një dështim personal për prindin. Nuk bëhet fjalë vetëm për çorapet, mëngjesin apo betejat para gjumit.
Bëhet fjalë për fëmijën e vogël brenda nesh, i cili kujton se si është ndier kur është shpërfillur, keqkuptuar ose gjykuar.
Kjo është zemra e procesit të ripërkujdesjes ndaj fëmijës së brendshëm: të kuptojmë se si e kaluara jonë ndikon në reagimet tona, në mënyrë që sot të mund të jemi prindi që dëshirojmë të jemi.
Çfarë është fëmija i brendshëm dhe pse ka rëndësi në prindërim?
Fëmija i brendshëm është gjurma emocionale e fëmijërisë sonë — ajo pjesë e vetes që ende mbart nevoja të paplotësuara, kujtime të dhimbshme ose mënyra të mësuara për t’u përballur me vështirësitë.
Edhe pse jemi rritur dhe kemi përgjegjësi, përvojë dhe logjikë si të rritur, ky version më i vogël i yni vazhdon të ndikojë në mënyrën si ndihemi, sidomos gjatë periudhave stresuese.
Kjo është arsyeja pse shpërthimet emocionale të fëmijës mund të na prekin kaq shumë. Nuk është vetëm durimi ynë që po vihet në provë. Është edhe fëmija ynë i brendshëm që na thotë:
“Prit, kjo ndjenjë më duket e njohur. Pse askush nuk më qetësonte mua kështu kur isha i vogël?”
Kur nuk i kushtojmë vëmendje fëmijës tonë të brendshëm, prindërimi bëhet edhe më i rëndë: ne përpiqemi të qetësojmë fëmijët tanë, ndërkohë që përballemi me plagët tona emocionale të pazgjidhura.
Pse ka rëndësi kjo?
Mënyra se si reagojmë ndaj fëmijëve tanë nuk lidhet vetëm me ta.
Ajo lidhet edhe me historitë që i tregojmë vetes:
“Nëse fëmija im nuk ndalon së qari, do të thotë se jam prind i keq.”
“Nëse ai nuk sillet mirë, do të thotë se kam dështuar si prind.”
“Ky shpërthim tregon se ai nuk do të përshtatet kurrë me botën.”
Këto nuk janë të vërteta.
Këto janë zëra dhe bindje të krijuara nga përvojat tona të brendshme.
Kur i besojmë këto mendime, ne i shtojmë turp dhe faj rrugëtimit tonë si prindër.
Duke kuptuar fëmijën tonë të brendshëm, ne çlirohemi nga ideja se sjellja e fëmijës është një “matës” i vlerës sonë si prindër dhe krijojmë hapësirë për një prindërim më të dhembshur, më të qetë dhe më të vetëdijshëm.
Si të kujdesemi për fëmijën tonë të brendshëm ndërsa rrisim fëmijët tanë?
1. Ndaloni dhe pyesni:
“Çfarë po më shkakton vërtet këtë reagim?”
Herën tjetër kur ndiheni të pushtuar pas një shpërthimi emocional të fëmijës, ndaloni për një moment dhe pyesni:
A lidhet kjo vetëm me fëmijën tim… apo edhe me mua?
Vetëdija është hapi i parë drejt thyerjes së cikleve të vjetra.
2. Shkruani për fëmijën tuaj të brendshëm
Shënoni atë që ndjetë në atë moment dhe përpiquni ta lidhni me kujtime të mëparshme.
Për shembull: “Kur fëmija im nuk ndalonte së bërtituri, u ndjeva i pafuqishëm, njësoj si kur isha fëmijë dhe askush nuk më dëgjonte.”
Kjo ju ndihmon të dalloni modelet emocionale dhe të zvogëloni fajësimin ndaj vetes.
3. Ndani sjelljen e fëmijës nga vlera juaj si prind
Shpërthimet emocionale dhe vështirësitë e fëmijës nuk do të thonë se po dështoni.
Ato tregojnë se fëmija juaj po mëson të menaxhojë emocionet e tij dhe ju po mësoni të menaxhoni tuajat.
4. Praktikoni mëshirën ndaj vetes
Kur gaboni, flisni me veten ashtu siç do t’i flisnit një miku të dashur:
“Është e vështirë të qëndrosh i qetë kur je i lodhur dhe i stresuar. Po përpiqesh më të mirën dhe mund të provosh përsëri herën tjetër.”
5. Praktikoni vetëdijen në moment
Edhe një frymëmarrje e thellë para se të reagoni mund të krijojë një hapësirë mes sjelljes së fëmijës dhe reagimit tuaj.
Kjo hapësirë ju jep mundësinë të zgjidhni një mënyrë tjetër reagimi.
Pse kjo ka rëndësi për prindërimin?
Prindërimi nuk ka të bëjë me të bërë gjithçka në mënyrë perfekte.
Ka të bëjë me praninë dhe lidhjen emocionale.
Kur punoni me fëmijën tuaj të brendshëm, ju:
- I mësoni fëmijëve tuaj qëndrueshmërinë dhe sinqeritetin emocional.
- Thyeni ciklet e dhimbjeve që kalojnë nga një brez në tjetrin.
- Krijoni një shtëpi ku gabimet nuk shihen si dështime, por si mundësi për të mësuar dhe për t’u rritur.
Ky është një përfitim i dyfishtë: më mirë për ju dhe më mirë për fëmijët tuaj.
Autor: Markela Kaplani
Përkthim: Prindërimi.com
