Nuk ka asgjë më shumë sesa prindërimi që të mëson se qeniet njerëzore, para se të mendojnë, kanë ndjenja dhe se foshnjat dhe fëmijët, më shumë se gjithçka tjetër, janë mishërimi i ndjenjave të tyre. Mënyra se si ju i përgjigjeni dhe reagoni ndaj ndjenjave të fëmijës suaj është e rëndësishme sepse nevoja jonë thelbësore si qenie njerëzore (të vegjël apo të rritur, ti dhe unë), është që t’i për jetojmë dhe t’i kuptojmë ndjenjat tona nëpërmjet njerëzve të rëndësishëm të jetës sonë.
Një foshnjë është një qenie e përbërë vetëm nga ndjenja, ose thënë ndryshe, nga një grumbull ndjenjash. Jo gjithmonë jemi në gjendje të kuptojmë gjithçka që ata ndiejnë. Ndonjëherë na nevojitet shumë kohë për t’i bërë ata të ndihen të qetë, por e rëndësishme është që përpjekjes t’i shtoni edhe dashuri, në mënyrë që të ndërtoni themelet e një shëndeti të mirë emocional për të ardhmen e foshnjës suaj. Nëse i merrni seriozisht në konsideratë ndjenjat e fëmijëve tuaj në vitet e para të jetës, ata do të mësojnë që nëse ndonjë ndjesi nuk është e mirë, do të përmirësohet në të ardhmen, veçanërisht nëse i ndajnë ndjenjat e tyre me dikë që është dashamirës ndaj tyre.
Duke iu përgjigjur me dashamirësi ndjenjave të foshnjës ose fëmijës suaj, e mëson atë që të ketë një marrëdhënie të shëndetshme me ndjenjat e veta, sidoqofshin ato ndjenja, duke filluar nga zemërimi apo hidhërimi, duke vazhduar me kënaqësinë apo ndjenjën e qetësisë dhe çlodhjes, deri te ndjenja e lumturisë dhe zemërgjerësisë.
Përgatiti: Prinderimi.com
Autor: Philippa Perry, “Libri që do të dëshironit të lexonin prindërit tuaj”
