Klinika e Kirurgjisë Vaskulare në Qendrën Klinike dhe Universitare të Kosovës (QKUK), po përballet me sfida serioze për shkak të mungesës së stafit dhe listave të gjata të pritjes për intervenime kirurgjikale, veçanërisht për trajtimin e venave varikoze.
Drejtori i klinikës, Hajriz Rudari, për “Front Online” tha se pavarësisht rritjes së numrit të operacioneve, situata vazhdon të jetë e rënduar për shkak të mungesës së anesteziologëve dhe resurseve të tjera bazike.
“Shërbimet për të cilat pacientët presin prej dy vite e gjysmë deri tre vite janë sëmundjet e venave të jashtme – venat varikoze që fatmirësisht janë sëmundje që mund të presin dhe që nuk shkaktojnë ndonjë komplikim serioz. Si shkaqe që çojnë në pritje të listës së pritjes është mungesa e anesteziologëve, vendit të hospitalizimit dhe trendi i rritjes së kësaj patologjie (variceve venoze)”, theksoi Rudari.
Rudari thotë se pandemia ka ndikuar në numrin e rritjes së numrit të listës.
“Duhet shtuar se gjatë ditës kryhen dy deri tre vena kurse hyjnë nga pesë deri gjashtë vena në listë pritjeje sepse trendi i rritjes së sëmundjeve venoze është në rritje. Pandemia ka ndikuar në ngadalësimin e zvogëlimit të listës së pritjes”, u shpreh ai.
Drejtori i Klinikës së Kirurgjisë Vaskulare, Hajriz Rudari bëri të ditur se vetëm në gjashtëmujorin e parë të vitit 2025, sipas Rudarit, në klinikë janë realizuar 244 operacione për vena, më shumë sesa gjatë tërë vitit të kaluar.
“Është shtuar dukshëm numri i intervenimeve brenda vitit krahasuar me vitet paraprake ku në gjashtëmujorin e këtij viti janë realizuar 244 vena që krahasuar me vitin paraprak (gjatë tërë vitit janë realizuar 235) është numër shumë më i madh i intervenimeve (nga kirurgjia venoze) duke shtuar që jemi duke realizuar edhe intervenime me Radiofrekuencë që fatkeqësisht indikacioni për intervenim gjatë seleksionimit me këtë metodë është shumë i vogël në kuadër të listës së pritjes, për çfarë vlen të theksohet se 90% janë me metodën klasike (operacion)”, tha ai.
Për të përballuar këtë situatë, drejtoria e klinikës ka paraqitur një projekt të veçantë pranë menaxhmentit të QKUK-së dhe Ministrisë së Shëndetësisë.
“Për të shkurtuar këto lista kemi bërë një projekt që e kemi diskutuar me menaxhmentet e QKUK dhe presim bashkëpunimin që të analizojmë mundësinë e realizimit në kuadër të mundësive ligjore. Besojmë se si për çdo projekt dhe iniciativë të kemi mbështetjen edhe nga menaxhmenti i SHSKUK-së dhe Ministria e Shëndetësisë, si çdo herë në të mirën e pacientëve”, deklaroi Rudari.
Ai shtoi se përkundër sfidave, klinika ka shënuar edhe përparime të rëndësishme.
“Kemi shtuar edhe si shërbim për pacientët që dy vite vendosjen e port sistemeve (port-a-Cath) për të siguruar qasje të përhershme në venat e pacientëve me sëmundje malinje (kanceroze) që ka qenë shumë e kushtueshme për pacientët dhe tani vendosen në Klinikën e Kirurgjisë Vaskulare nga kirurgët vaskularë pa asnjë problem”, deklaroi ai.
Mungesë të barnave nuk ka, sipas drejtorit Rudarit.
“Sa i përket mungesës së barnave nuk ka ndonjë vakum apo mungesë të theksuar dhe të gjatë që mund të interferojë në trajtim të pacientëve”, u shpreh ai.
Çdo vit në Kosovë rreth 60 raste me sëmundje malinje tek fëmijët
Situata e punës në Klinikën e Kirurgjisë Vaskulare në QKUK, me vetëm 24 shtretër dhe mungesë të theksuar të stafit dhe resurseve bazike, po bëhet gjithnjë e më e rëndë përballë rritjes së numrit të pacientëve kronikë.
Kështu deklaron drejtori i kësaj klinike, Hajriz Rudari.
“Si Klinikë, duke marrë parasysh që për momentin jemi e vetmja Qendër në Kosovë që ofrojmë trajtime dhe shërbime nga lëmia e sëmundjeve Vaskulare ku kemi në dispozicion vetëm 24 shtretër dhe kemi nevojë për zgjerimin e shërbimit si me vende ashtu edhe me rritje të shërbimeve dhe duke marrë parasysh rritjen e numrit të pacientëve me sëmundje kronike vaskulare (arteriosklerozë, trombozë, diabeti, hipertensioni, venat varikoze, etj.) për shkak të stilit të jetesës moderne dhe rritja e kërkesës për trajtim bën të nevojshme që të rriten kapacitetet dhe burimet njerëzore, gjithashtu trajnimi dhe mbajtja e stafit cilësorë është sfidë e vazhduar ku kirurgët duhet të jenë të përditësuar me teknika të reja vaskulare”, potencoi Rudari.
Rudari thotë se përveç hapësirës së kufizuar, Klinika përballet edhe me mungesë të anesteziologëve, e stafit infermieror, çka pengon zhvillimin normal të punës.
Ai pranoi se menaxhimi i listës së pritjes mbetet një sfidë serioze, edhe pse për disa lloje sëmundjesh nuk ka listë aktive.
“Sfidë tjetër kemi edhe menaxhimin e listës së pritjes deri në eliminimin e plotë të saj. Listë pritjeje për raste sëmundje tjera vaskulare nuk kemi. Të gjitha këto ndihmojnë të fokusohemi në rritje të cilësisë së shërbimeve shëndetësore ku dukshëm përveç hapësirës së ngushtë të veprimit kemi edhe mungesën faktike të anesteziologëve, mungesën e vendeve të hospitalizimit, mungesën e stafit infermieror, stafit bartës si dhe higjeno-sanitare”, deklaroi Rudari.
