Një kopsht i vogël urban mund të kontribuojë në shëndetin tuaj, veçanërisht nëse kopshti përmban tokë të pasur, zbulon një studim i ri.
Një periudhë njëmujore e kopshtarisë së brendshme rriti diversitetin bakterial të lëkurës së pjesëmarrësve dhe dukej se përmirësonte përgjigjen e tyre ndaj inflamacionit, zbuluan studiuesit.
Rritja, korrja dhe konsumimi i ushqimit të prodhuar në një kopsht urban çdo ditë mund të ndihmojë banorët e qytetit të shmangin sëmundjet, sugjerojnë studiuesit – shkruan burimi Health Day përcjell Gazeta Shneta.
“Gjetjet janë domethënëse, pasi urbanizimi ka çuar në një rritje të konsiderueshme të sëmundjeve të ndërmjetësuara nga imuniteti, si alergjitë, astma dhe sëmundjet autoimune, duke gjeneruar kosto të larta të kujdesit shëndetësor. Ne jetojmë shumë ‘pastër’ në qytete”, tha autorja kryesore e studimit, Mika Saarenpaa, studiuese doktorature në Universitetin e Helsinkit në Finlandë.
“Kjo është hera e parë që mund të tregojmë se aktiviteti njerëzor kuptimplotë dhe natyror mund të rrisë diversitetin e mikrobiotës së të rriturve të shëndetshëm dhe në të njëjtën kohë, të kontribuojë në rregullimin e sistemit imunitar.”
Përmirësimet midis njerëzve që punojnë me tokë të pasur teorikisht mund të çojnë në shëndet më të mirë duke përmirësuar përgjigjen imune ndaj sëmundjes, thanë studiuesit.
Studimi i ri u publikua së fundmi në revistën “Environment International”.
“Nëse kopshtaria kthehet në një hobi, mund të supozohet se rregullimi i sistemit imunitar bëhet gjithnjë e më i vazhdueshëm,” tha Saarenpaa.
Bazuar në këto gjetje, Saarenpaa tha se shkollat dhe prindërit duhet të konsiderojnë që fëmijët të kenë kopsht me tokë të pasur, pasi zhvillimi i sistemit imunitar është më aktiv në fëmijëri. /Gazeta Shneta/
