Një atmosferë e kënaqshme
Kur flasim për një atmosferë të mirë familjare, që e nxit leximin duhet të shtojmë se kjo atmosferë duhet të jetë e këndshme dhe tërheqëse për fëmijën. Kur flasim për një atmosferë të kënaqshme, gjëja e parë që na shkon në mend janë pamjet e mahnitshme, ajri i pastër dhe moti i mirë. Përderisa këto padyshim luajnë rol të madh për arritjen e një gjendjeje të mirë shpirtërore, nuk i nënkuptoj ato në këtë temë.
Atë që e nënkuptoj është ndjenja e fëmijës se po jeton në një familje të lumtur, të gëzueshme dhe bashkëpunuese. Për ti realizuar ato vlera duhet të shpenzojmë pak para dhe shumë të kuptuar, sakrificë dhe kujdes. Shtëpitë që janë pa kënaqësi, qetësi dhe gëzim kanë shumë pak gjasë t’i inspirojnë fëmijët të rriten me një prirje për të lexuar libra vazhdimisht.
Një atmosferë e kënaqshme bën që përvoja e mësimit të jetë më e thellë dhe më solide. Ajo do t’u sigurojë fëmijëve energjinë morale për të qenë të tërhequr për të lexuar. Një vajzë e re i tha nënës së saj: “Nënë, ne jemi të pasur, apo jo? Tërë atë që na nevojitet e kemi dhe tani në shtëpinë tonë është një bibliotekë e madhe, e cila përmban libra të çdo shkence dhe të çdo dege të diturisë, mirëpo asnjëri prej nesh nuk duket të jetë i prirë për të lexuar, madje asnjëri prej nesh nuk hyn në bibliotekë.
Në kontrast me ne, fqinjët tanë janë të varfër, por fëmijët e tyre, djemtë dhe vajzat marrin pjesë në aktivitete intelektuale që organizohen në lagjen tonë. Është vërtet për t’u admiruar. Përveç kësaj ata janë të shkëlqyeshëm në shkollë. Pse ky dallimi midis nesh?
Nënës i rridhnin lotët derisa e dëgjonte. Ajo mbeti e heshtur për një kohë derisa u detyrua të fliste pas insistimit të të bijës: “Në rregull, bija ime, krejt fillon me marrëdhëniet e këqija midis babait tënd dhe meje. Prej kur u mundua t’i merrte nën pronësi paratë që i kam trashëguar nga babai im, në shtëpinë tonë filloi një luftë. Ne jemi bërë si dy grupe luftuese, disa fëmijë janë në anën time e disa në anën e tij. Kjo ka shkuar aq larg saqë është përdorur gjuhë e pistë. Tërë kjo e ka larguar gëzimin dhe lumturinë nga shtëpia jonë, atë që fqinjët tanë e gëzojnë. Natyrisht se kjo e ka larguar çdo mundësi që të punojmë së bashku për të përmirësuar jetën tonë dhe për t’u kujdesur për brengat e njëri-tjetrit.”
Vajza tha: “Oh, e kam ndjerë këtë disi, mirëpo kurrë nuk kam menduar që është aq keq.”
Ideja këtu është që mendjet të funksionojnë mirë, që shpirti të mësyjë horizonte të gjera dhe që motivet pozitive të lulëzojnë, individi ka nevojë për një atmosferë të kënaqshme dhe të këndshme. Kur atmosfera është e mërzitshme dhe e zymtë, aty lind pakënaqësia, inati dhe të gjitha prirjet negative. Atëherë të mos harrojmë pikat e ngritura për diskutim këtu.
Përgatiti: Prinderimi.com
Autor: Dr. Abdulkerim Bekkar, ”Fëmija lexon”
