Largimi i vëmendjes
Nëse do të ishte ndonjë mundësi që ju të largoni vëmendjen nga mendimet lidhur me frikën, ashtu që ju të mos mendonit për belbëzimin tuaj, ju me siguri nuk do të kishit pasur vështirësi. Nëse ju do të harronit se belbëzoni, ju nuk do të belbëzonit fare, por ne nuk e kemi të njohur se si do të mund ta zhvillonit një “harrueshmëri” të tillë.
Çdo gjë që largon vëmendjen tuaj nga frika ose e largon mendimin nga parashikimi i belbëzimit, zakonisht do të ju sillte një lehtësim momental. Kjo është arsyeja kryesore pse personat që belbëzojnë nganjëherë mashtrohen me anë të procedurave të ndërlikuara siç janë të folurit me modulim monoton, ritëm metronomik, të folurit duke trokitur me gisht, tundje të krahut, ose me goditje të këmbës, etj. Këto dhe shumë mënyra tjera të çuditshme të të folurit mund të shkaktojnë vetëm rrjedhshmëri momentale.
Vetëm mendimi lidhur me atë se si të shfrytëzohen ato kur ju parashikoni vështirësinë, e zhvendos vëmendjen tuaj nga belbëzimi. Ato mund të njollosin përkohësisht mendimet tona të frikës por nuk do të rezultojnë në redukim të përhershëm të frikës ndaj belbëzimit. Çuditërisht, gati çdo teknikë e re ose e pazakonshme3,1 do t’i ndihmoj përkohësisht çdo personi që belbëzon – së paku derisa risia të konsumohet – nëse ai ka besim në efektshmërinë e saj.
Mbështetja nga të tjerët
Do të ishte fatlume nëse do të gjenit ndihmën nga një logoped kompetent, i trajnuar në fushën e belbëzimit. Megjithatë, ky program i vetë-terapisë është planifikuar me supozimin se nuk keni një ndihmë të tillë të specializuar. Madje edhe sikur ta kishit, suksesi i çdo programi është ende kryesisht i varur nga përpjekjet tuaja. Kjo nuk do të thotë se ju duhet të kundërshtoni ndihmën nga të tjerët pasi juve ju nevojiten njerëzit për të folur me ta dhe për të ushtruar. Nëse keni ndonjë anëtar të familjes ose shok të afërm me të cilin keni një raport të mirë dhe të besueshëm, ai ose ajo do të ishte në gjendje të paraqet një shërbim të vlefshëm në shumë mënyra.
Duke interpretuar një mbikqyrës, personi i tillë do të ishte në gjendje të shikonte dhe të dëgjonte gjërat për të cilat ju mund të mos jeni i vetëdijshëm. Është gjithashtu e mundshme që kur të studioni mënyrën se si belbëzoni (që do të diskutohet më vonë), shoku i tillë mund të duplikonte belbëzimin tuaj për t’ju ndihmuar që të bëheni i vetëdijshëm për atë se çfarë bëni kur keni vështirësi.
Ai ose ajo mund t’ju shoqëronte në disa prej detyrave tuaja, do të bënte komplimente për përpjekjet tuaja, do t’ju jepte përkrahje morale duke ju kurajuar për të vazhduar dhe këmbëngulur deri sa ta arrini qëllimin tuaj. Do t’ju nevojitet i tërë inkurajimi që do të merrnit.
Nganjëherë shokët me qëllime të mira ju ofrojnë këshilla pa kërkuar nga ta rreth asaj se çfarë kanë dëgjuar ose mendojnë se ju duhet të bëni për të mposhtur belbëzimin tuaj. Edhepse këshillat e tilla mund të jenë të pamatura dhe të padëshiruara, ju sugjerojmë që të pranohen në mënyrë të sjellshme edhe pse ato janë të bazuara në të kuptuarit joadekuat të problemit.
Në disa vende, organizohen grupe mbështetëse të personave që belbëzojnë. Ata takohen rregullisht për t’i ndihmuar njëri-tjetrit që të punojnë lidhur me problemin e tyre. Nëse grupi i tillë do të kishte një udhëheqës të aftë, kjo do të ishte me vlerë.
Vendosmëria
Nuk ka rrugë të lehtë drejt rrjedhshmërisë. Për të përmbushur terapia qëllimin e saj, ajo kërkon vendosmëri. Është e domosdoshme nga ju që të keni kurajo të konfrontoheni kokë më kokë me belbëzimin tuaj dhe të ndërmerrni detyra që do të kërkojnë shumë punë dhe me siguri edhe shumë vështirësi.3 A ia vlen gjithë ky mund nëpër të cilin duhet të kaloni për një të folur më të rrjedhshëm? Kjo varet nga ju.
Në të vërtetë, vështirësitë që i provoni do të ju ndihmojnë që të redukoni ndjeshmërinë e cila e keqëson belbëzimin tuaj. Dhe duke u bërë më pak i ndjeshëm ndaj vështirësisë tuaj, do të jetë më lehtë për ju që t’i përmbaheni procedurave të rekomanduara.
Nëse ju ndjeheni se belbëzimi juaj është një e metë, ju duhet të gjeni mënyra dhe mjete që të keni një jetë më të mirë me anë të të folurit më të rrjedhshëm. Ju duhet të ndjeheni më mirë lidhur me vetveten si person. Edhepse ju nuk duhet të kërkoni ose të shpresoni në përsosshmëri, ju dëshironi të flisni më rrjedhshëm. Por për të bërë këtë, duhet vendosmëria për të bërë ndryshimet në mënyrën se si flisni dhe në vetvete. Këto ndryshime mund t’ju fusin në kontroll dhe të ju bëjnë juve zotërues të të folurit tuaj.
Ne themi se ju mund të keni sukses, dhe se shpërblimi është shumë më i madh se çmimi që paguani. Por kjo kërkon përkushtim nga ana juaj që të ndryshoni qëndrimet e juaja ndaj problemit. Belbëzimi është një defekt kokëfortë dhe nuk dorëzohet lehtë. Terapia është një sfidë. Vendimi është i juaji.
Autor: Malcolm Fraster, ”Vetë-terapia për belbëzim’‘
Përgatitur nga: Prinderimi.com
