Fëmijët që marrin kujdes nga edukatorë të cilët ofrojnë ngrohtësi emocionale dhe stimulim njohës arrijnë rezultate më të mira në lëndët STEM gjatë shkollës së mesme.
Uashington – Fëmijët që përfitojnë kujdes cilësor gjatë foshnjërisë, moshës së hershme dhe periudhës parashkollore arrijnë rezultate më të mira në shkencë, teknologji, inxhinieri dhe matematikë (STEM) deri në shkollën e mesme. Kjo lidhje është edhe më e fortë te fëmijët që vijnë nga familje me të ardhura të ulëta, sipas një hulumtimi të publikuar nga Shoqata Amerikane e Psikologjisë (APA).
“Rezultatet tona sugjerojnë se cilësia e kujdesit gjatë fëmijërisë së hershme mund të krijojë një bazë të fortë për një rrugëtim të suksesshëm në fushat STEM”, tha autori i studimit, Dr. Andres S. Bustamante, nga Universiteti i Kalifornisë në Irvine.
“Investimi në kujdesin cilësor ndaj fëmijëve dhe në edukimin e hershëm mund të ndihmojë në zvogëlimin e përfaqësimit të pamjaftueshëm të grupeve të ndryshme racore dhe etnike në fushat STEM.”
Hulumtimi u publikua në revistën shkencore *Developmental Psychology*.
Studime të shumta kanë treguar se kujdesi cilësor gjatë fëmijërisë së hershme lidhet me përgatitje më të mirë për shkollë, veçanërisht te fëmijët nga familjet me të ardhura të ulëta. Megjithatë, sipas Bustamante, më pak studime kanë shqyrtuar se si ndikimi i kujdesit të hershëm vazhdon deri në shkollën e mesme, ndërsa edhe më të pakta janë ato që janë përqendruar posaçërisht në lëndët STEM.
Si u realizua studimi?
Për t’i shqyrtuar këto çështje, Bustamante dhe kolegët e tij analizuan të dhënat e 979 familjeve që kishin marrë pjesë në studimin e Institutit Kombëtar Amerikan për Shëndetin e Fëmijëve dhe Zhvillimin Njerëzor, të njohur si Study of Early Child Care and Youth Development.
Studimi i kishte ndjekur fëmijët që nga lindja e tyre në vitin 1991 deri në vitin 2006.
Si pjesë e hulumtimit, vëzhgues të trajnuar vizituan institucionet e kujdesit ditor dhe ato parashkollore ku fëmijët qëndronin të paktën 10 orë në javë.
Vizitat u realizuan kur fëmijët ishin 6, 15, 24, 36 dhe 54 muajsh.
Vëzhguesit vlerësuan dy aspekte kryesore të cilësisë së kujdesit:
1. Ngrohtësinë emocionale dhe ndjeshmërinë e edukatorëve
U vlerësua se sa edukatorët krijonin një mjedis të ngrohtë dhe mbështetës, si dhe sa i kuptonin dhe u përgjigjeshin interesave dhe emocioneve të fëmijëve.
2. Stimulimin njohës
U vlerësua se sa edukatorët e nxisnin zhvillimin intelektual të fëmijëve përmes përdorimit të një gjuhe të pasur, parashtrimit të pyetjeve që i shtynin të mendonin dhe dhënies së komenteve e shpjegimeve që ua thellonin kuptimin e koncepteve.
Si u mat suksesi i fëmijëve në shkencë dhe matematikë?
Studiuesit shqyrtuan më pas rezultatet e nxënësve në lëndët STEM gjatë shkollës fillore dhe asaj të mesme.
Për të matur suksesin në shkollën fillore, ata analizuan rezultatet e fëmijëve në pjesët e matematikës dhe arsyetimit të një testi të standardizuar, nga klasa e tretë deri në klasën e pestë.
Për të vlerësuar arritjet në shkollën e mesme, studiuesit morën parasysh:
– Rezultatet e testeve të standardizuara.
– Nivelin më të avancuar të lëndës së shkencës që nxënësit kishin përfunduar.
– Nivelin më të avancuar të lëndës së matematikës që kishin përfunduar.
– Mesataren e notave në lëndët shkencore.
– Mesataren e notave në matematikë.
Çfarë treguan rezultatet?
Në përgjithësi, studiuesit zbuluan se të dyja aspektet e cilësisë së kujdesit, stimulimi më i madh njohës dhe ndjeshmëria e përgjegjshmëria më e mirë e edukatorëve, parashikonin arritje më të larta në lëndët STEM gjatë klasave të treta, të katërta dhe të pesta.
Këto arritje, nga ana tjetër, parashikonin rezultate më të mira në shkencë dhe matematikë në shkollën e mesme, në moshën 15-vjeçare.
Kujdesi i ndjeshëm dhe i përgjegjshëm gjatë fëmijërisë së hershme rezultoi një parashikues më i fortë i suksesit në lëndët STEM në shkollën e mesme për fëmijët nga familjet me të ardhura të ulëta, krahasuar me fëmijët nga familjet me të ardhura më të larta.
“Hipoteza jonë ishte se stimulimi njohës do të kishte një lidhje më të fortë me rezultatet në STEM, sepse ndërveprime të tilla krijojnë bazën për eksplorim dhe kërkim, të cilat janë thelbësore për të nxënit në këto fusha”, tha Bustamante.
“Megjithatë, ajo që vërejtëm ishte se ndjeshmëria dhe përgjegjshmëria e edukatorëve ishin po aq të rëndësishme në parashikimin e rezultateve të mëvonshme në STEM. Kjo thekson rëndësinë e zhvillimit socio-emocional të fëmijëve dhe të mjediseve që mbështesin njëkohësisht aftësitë njohëse dhe ato socio-emocionale.”
Pse është i rëndësishëm investimi në edukimin e hershëm?
Sipas Bustamante, hulumtimet dhe teoritë shkencore sugjerojnë se praktikat cilësore të kujdesit në fëmijërinë e hershme krijojnë një bazë të fortë për të nxënit në shkencë.
“Të marra së bashku, këto rezultate theksojnë se stimulimi njohës, ndjeshmëria dhe përgjegjshmëria e edukatorëve gjatë fëmijërisë së hershme përbëjnë fusha të rëndësishme për investim, me qëllim forcimin e rrugëtimit arsimor drejt fushave STEM, veçanërisht për fëmijët nga familjet me të ardhura të ulëta.”
Autorët: Andres S. Bustamante, PhD; Vanessa N. Bermudez, MA; Karlena D. Ochoa, PhD; Ashlee B. Belgrave, MA; dhe Deborah Lowe Vandell, PhD.
Përkthim: Prinderimi.com
