Ekspertët theksojnë se disa ushqime mund të ndihmojnë në ruajtjen e një sistemi të fortë imunitar, reduktimin e inflamacionit dhe shërimin më të shpejtë nga sëmundja.
Por cilat ushqime forcojnë sistemin imunitar, këtu kemi listuar disa prej tyre:
Agrumet
Portokallet, limonët e mandarinat janë të pasura me vitaminë C, e cila stimulon prodhimin e qelizave të bardha të gjakut, vendimtare për luftimin e infeksioneve. Përveç forcimit të sistemit imunitar, agrumet kontribuojnë në shëndetin e lëkurës dhe ndihmojnë trupin të përthithë më mirë hekurin nga ushqimet bimore, gjë që është veçanërisht e rëndësishme për njerëzit që nuk konsumojnë mish.
Hudhra
Hudhra përmban alicinë, një përbërës që ka veti të forta antibakteriale dhe antivirale. Shtimi i rregullt i hudhrës në dietën tuaj mund të ndihmojë në rritjen e imunitetit, si dhe në uljen e shpeshtësisë së ftohjes dhe gripit. Ky ushqim i njohur gjithashtu kontribuon në shëndetin e zemrës, sepse ndihmon në rregullimin e presionit të gjakut dhe ul nivelin e kolesterolit.
Xhenxhefil
Xhenxhefili është i njohur për vetitë e tij anti-inflamatore dhe antioksiduese. Ndihmon në lehtësimin e dhimbjeve të fytit, redukton proceset inflamatore në trup dhe stimulon qarkullimin, gjë që mund të përshpejtojë shërimin nga infeksionet. Po kështu, xhenxhefili mund të lehtësojë problemet e tretjes dhe të zvogëlojë ndjenjat e të përzierave, duke e bërë atë një shtesë të shkëlqyer për çajrat gjatë ftohjeve sezonale.
Mjalti
Mjalti vepron si një antiseptik natyral dhe ndihmon në lehtësimin e simptomave të ftohjes dhe kollitjes. Vetitë e tij antibakteriale e bëjnë atë një suplement ushqimor të dobishëm gjatë viruseve të stinës. Është i pasur me antioksidantë që ndihmojnë në reduktimin e stresit oksidativ në trup, dhe konsumimi i mjaltit para gjumit mund të përmirësojë cilësinë e gjumit.
Arra
Vitamina E është një antioksidant i fuqishëm që mbron qelizat nga dëmtimi dhe mbështet sistemin imunitar. Bajamet, lajthitë dhe arrat janë një burim i shkëlqyer i kësaj vitamine, dhe ato gjithashtu përmbajnë yndyrna të shëndetshme që kontribuojnë në përthithjen më të mirë të lëndëve ushqyese. Një grusht bajame në ditë mund të ndihmojë në ruajtjen e shëndetit të lëkurës dhe mbrojtjen e trupit nga stresi oksidativ.
Peshku i yndyrshëm
Acidet yndyrore omega-3 ndihmojnë në reduktimin e inflamacionit dhe rritjen e përgjigjes imune. Salmoni, sardelet dhe skumbri janë burime të shkëlqyera të këtyre yndyrave të shëndetshme që mbështesin shëndetin e zemrës dhe imunitetit. Përveç kësaj, acidet yndyrore omega-3 kanë një efekt pozitiv në funksionin e trurit dhe mund të zvogëlojnë rrezikun e depresionit dhe ankthit.
Spinaqi
Spinaqi është i pasur me vitaminë C, beta-karoten dhe antioksidantë që ndihmojnë trupin të luftojë infeksionet. Ai përmban hekur, i cili kontribuon në formimin e qelizave të kuqe të gjakut dhe ndihmon në uljen e lodhjes. Është mirë që ta konsumoni të gatuar lehtë për të ruajtur lëndët ushqyese dhe për të përmirësuar përthithjen e hekurit.
*Klikoni KËTU për t´u bërë pjesë e kanalit zyrtar të Rrjetit të Prindërve të Kosovës në Viber.
