Nuk të dua më
Dashuria është një nga nevojat e domosdoshme për fëmijën, në mënyrë që ai të rritet dhe të zhvillohet natyrshëm, kurse mungesa ose pakësimi i dashurisë, shkakton boshllëqe dhe të meta në këtë zhvillim, e që natyrshëm ndikon edhe në dobësimin ose zhdukjen e cilësive që e bëjnë një fëmijë yll në të ardhmen.
Abidetu El Muejed thotë: “Fëmija ka nevojë për çdo lloj shprehje të dashurisë së nënës për të, si dhe për konfirmimin e vazhdimësisë së kësaj dashurie në mënyrë të vazhdueshme, duke i dhënë gjallëri asaj, si me fjalë, ashtu edhe me vepra. Për këtë arsye, një shprehje e tillë, “Nuk të dua më”, nuk mund të jetë kalimtare për një fëmijë të vogël. Fjalët e saj janë të pakta në numër, por ndikimi i tyre negativ mund të dëmtojë lumturinë e tij dhe të cenojë edhe stabilitetin e tij shpirtëror, sepse fëmijët kanë nevojë për dashurinë e prindërve të tyre më shumë se për gjithçka tjetër në jetë. Kushdo që vuan nga dobësimi ose mungesa e kësaj dashurie, e ka jetën shumë të vështirë.
Prandaj, çdo nënë duhet të ketë kujdes, që të mos e kërcënojë fëmijën e saj me këtë shprehje dhe të mos e përdorë dashurinë, që është një nevojë bazë dhe e domosdoshme, si një armë për të kërcënuar të vegjlit, duke i bërë ata që ta humbasin sigurinë dhe të ndihen të frikësuar nga fakti se mos vallë ndonjë ditë mund ta humbasin dashurinë e prindërve, përkujdesjen dhe përkëdheljet e tyre”. (Shiko librin “Shprehje të rrezikshme” të autores Abidetu El Muejed, f. 64-65).
Edhe në rast ndëshkimi, prindërit duhet t’i thonë fëmijës: “Ne të duam shumë, por ne nuk na pëlqen ky veprim që bën ti”, etj. Kështu, ne e bëjmë atë që të ndihet gjithmonë i sigurt, gjë që është një nga bazat, që e shtyjnë atë drejt rrugës për t’u bërë një yll.
Përgatiti: Prinderimi.com
Autor: Abdulhamid Bilali, ”Si ta bësh fëmijën tënd yll”
