Rutina ditore për kujdesin e dhëmbëve
Cilat janë brushat adekuate për pastrimin e dhëmbëve?
Pastrimi i dhëmbëve me anë të brushës është njëra ndër metodat më të zakonshme me anë të së cilës arrihet mbajtja e higjienës orale në përgjithësi.
Në treg ka një lloj-llojshmëri të brushave duke i dalluar ato për nga dizajni, gjatësia, numri i fijeve. Ato klasifikohen gjithashtu edhe si brusha të buta, të mesme dhe brusha të forta.
Në bazë të këtij klasifikimi duhet të përzgjedhet brusha konform gjendjes së shëndetit oral e veçanërisht mishit të dhëmbëve(gingivës), pasi që pastrimi i dhëmbëve me një brushë të fortë në mishra të inflamuar do të përkeqësonte edhe më tej gjendjen, gjithashtu mund të ketë si pasojë erozionin e smaltit.
Kështu që në bazë të kësaj preferohet më shumë përdorimi i brushave të buta ose atyre të mesme. Përzgjedhjen e tipit të brushës mund të bëni nga informatat të cilat ndodhen në paketimet e brushave.
Përveç brushave manuale, si produkte në mirëmbajtjen e higjienës orale përdorim gjejnë edhe brushat elektrike.
Madje, në disa raste kur fëmijët hezitojnë që të i pastrojnë dhëmbët me rregull mund të vij në shprehje edhe përdorimi i brushave elektrike të cilat mund të zgjojnë interes te fëmijët dhe në këtë mënyrë të krijojnë shprehinë e pastrimit të dhëmbëve.
Por që si mangësi e tyre mund të konsiderohet kostoja si dhe kujdesi në rimbursimin e baterisë të cilat do të komplikonin përdorimin e tyre.
Nga të gjitha këto mund të themi se e rëndësishme është shprehia e higjienës orale dhe teknikat e pastrimit, pavarësisht përdorimit të llojit të brushës asaj manuale apo elektrike.
Si t’i ruajmë brushat e dhëmbëve dhe kur t’i ndërrojmë ato?
Është shumë më rëndësi që brushat të ndërrohen çdo 3 muaj. Në rast që sëmureni apo keni ndonjë problem me shëndetin, përseri sugjerohet që të ndërrohet brusha.
Vendosni brushat në një ruajtës adekuat për brusha i cili mundëson ajrosjen e tyre. Të paktën një herë në jave dezinfektoni brushën tuaj duke përdorur peroksid hidrogjeni për disa minuta.
Sa shpesh duhet të pastrojmë dhëmbët?
Rekomandohet që pastrimi i dhëmbëve të bëhet të pakten dy herë në ditë, në mëngjes dhe në mbrëmje para gjumit, me kohëzgjatje prej 2-3 minutash.
Pasi të përfundoni me pastrimin e dhëmbëve, largoni pjesën e mbetur të pastës e cila krijohet në formë të shkumës, por nuk është e preferueshme që të shpërlani gojën me ujë, pasi që në këtë mënyre do të largohej flouri i cili është pjesë përbërse e pastës dhe konsiderohet element shumë i rëndësishëm për strukturën e fortë të dhëmbëve.
Përveç brushës, rekomandohet që në praktikën e mbajtjes së higjienës orale të jetë edhe përdorimi i perit interdental (floss), me anë të së cilit arrihet pastrimi i sipërfaqeve interdentale (hapërsira në mes të dy sipërfaqeve të dhëmbëve fqinj), pastrim ky i cili vështirë arrihet vetëm me brushë.
Për një shëndet më të mirë të hapësirës së gojës, duhet gjithashtu të bëhët edhe pastrimi i gjuhës, kjo mund të realizohet me anë të brushës. Pastrimi i gjuhës parandalon depozitimin e ushqimeve të buta dhe si rrjedhojë pamundëson aromën e padëshiruar nga goja.
Cilat janë teknikat adekuate të pastrimit të dhëmbëve?
Me anë të brushës dhe pastës ju filloni t’i pastroni dhëmbët. Është shumë e rëndësishme që secili kuadrat i nofullave(pjesët e majta dhe të djathta të te dy nofullave) të përfshihet nga procesi i pastrimit në një kohë proporcionale. Lëvizjet duhet të jenë të lehta dhe mos ushtroni trysni mbi brushë. Raporti i fijeve të brushës me dhëmbin dhe mishin e dhëmbëve duhet të jetë në pozicion 45°.
Roli i pastave
Pastat për pastrimin e dhëmbëve luajnë rol kyç në higjienën e gojës. Përbërsit e tyre mundësojnë funksione të ndryshme, si parandalues, bëjnë largimin apo menjanimin e pllakut dental,mund të prodhohen me shije dhe aromatizues të ndryshëm.
Kjo gjë që mundëson përdorimin më të lehtë të tyre e veçanërisht tek fëmijët, pra janë të dobishme sepse fëmijet priren të jenë më të rregullt në mbajtjen e higjienës orale kur pastat kane shije dhe aromë më të këndshme.
Sasia e përdorimit të pastës varet nga mosha, është shumë e rëndësishme që të fëmijët e vegjël nga 12-24 muaj, prindërit nuk duhet të apikojnë pastë më shumë se sa madhësia e një kokrre orizi.
Ndërsa nga mosha 2-6 vjeç, madhësia e sasisë së pastës që aplikohet duhet të jetë sa madhësia e kokrrës së bizeles.
Këto rekomandime ndihmojnë në marrjen e sasive të duhura të fluorit dhe parandalojnë gëlltitjen e tij në sasi të mëdha, pasi se siç dihet fëmijët e këtyre grupmoshave kanë tendencë që gjatë pastrimit të dhëmbëve të gëlltisin pastën.
Autore: Dr. Marigona Gashi, Prinderimi.com
