Trajnimi i fëmijës për t’i artikuluar nevojat e tij
Agresioni ndaj të tjerëve shpesh ndodh sepse fëmija nuk është trajnuar në asnjë mënyrë të shprehë veten, e as t’i artikulojë të drejtat dhe nevojat e tij. Kjo ndodh sepse prindërit, të cilët janë tepër të angazhuar në punë nuk kanë kohë ti trajnojnë fëmijët e tyre të përdorin gjuhën në vend të dorës për të ndërvepruar me të tjerët.
Një baba, i cili është mësues me profesion, gjithmonë është i interesuar t’i trajnojë fëmijët të jenë ideal në kuptimin e plotë të fjalës. Metoda e tij është debati dhe komunikimi me fëmijët. Ai thotë: “Si mësues, gjithmonë jam përpjekur t’i bëj fëmijët të shprehin çfarëdo që kanë pasur në mend në mënyrë të drejtpërdrejtë dhe elegante. Kjo vërtet e shton vetëbesimin e tyre dhe e ul ndonjë agresivitet në të vepruarit me të tjerët.”
Kur e pyesin për më tepër detaje, ai thotë: “Secili që pretendon se diçka i takon atij, duhet të deklarojë se çka është e tij, mirëpo në një mënyrë të sjellshme. Një person i fortë është ai që i njeh kufijtë e tij dhe nuk i tejkalon. Ai përpiqet të mos bëjë gabime në raport me të tjerët, kështu që të mos obligohet të kërkojë falje dhe që njerëzit të mos kenë një imazh negativ për të.
Nëse një fëmijë ta merr lapsin ose librin ose ndonjë gjë që është e jotja, thuaji qetë, por me vendosmëri: “Kjo është e imja dhe ti nuk mund të ma marrësh pa leje paraprake. Jam i zemëruar dhe duhet ta kthesh atë menjëherë.” Dhe t’ia thotë përsëri nëse është e nevojshme. Kur të veprosh kështu dhe kur çdonjëri të shohë se sa i drejtë dhe sa i arsyeshëm je, njerëzit do të mbajnë anën tënde. Nëse fëmija përsëri insiston në refuzimin për të dhënë atë që është e jotja, raportoje te mësuesi, te drejtori i shkollës ose të babai i tij. Pra, mos heq dorë nga e drejta jote dhe mos e merr si të drejtë agresionin e askujt ndaj teje. Nuk bën të thirret me emra të këqij, të shahet ose të goditet pala tjetër.
Gjithashtu fëmijëve u them: “Njerëzit nuk e kuptojnë se ajo që e thonë të zemëron ty. Ata mund të mos dinë se një gjë e caktuar është ofendim për ty. Na takon neve t’ua bëjmë me dije, e jo vetëm të vuajmë efektin e fjalëve të tyre në zemrën tonë. Mos lejo që ajo që e thonë të helmojë marrëdhëniet midis teje dhe tjetrit. Tërhiqja vërejtjen atij që flet me një tonë ofendues, i cili e ngrit zërin ndaj teje dhe i cili përdor gjuhë të fëlliqur se kjo të bezdis dhe se është e papranueshme për ty. Thuaj se nuk e duron një gjë të tillë prej tij ose prej dikujt tjetër.
Mbaje në mend se ne shpesh konfliktohemi me njëri-tjetrin vetëm për shkak të ndeshjes së botëkuptimeve, kur ti dhe tjetri ndieni se keni të drejtë absolute. Nëse kështu ndodh, në vend që të bësh debat të kotë, thuaj atij: “Unë sugjeroj të bëjmë bisedë të përzemërt”, ose “Kam një sugjerim, të gjejmë një zgjidhje për mospajtimin tonë” ose mund t’i thuash “Përdore këtë një orë dhe kthema pas një ore”.
Përgatiti: Prinderimi.com
Autor: Prof. Dr. Abdul Kerim Bekkar, “Problemet e fëmijëve”
