Prindër, kur fëmija juaj qan, bërtet dhe insiston që t’i plotësoni menjëherë kërkesën, mos u dorëzoni. Nëse e bëni, jo vetëm që nuk do ta zgjidhni problemin, por edhe do ta forconi këtë sjellje, duke e bërë një model të përsëritur për të ardhmen.
Pse ndodh kjo?
Sipas ekspertëve të zhvillimit fëmijëror, kjo sjellje nuk është thjesht një kapriçio, por një tregues i inteligjencës së fëmijës. Ai përpiqet të testojë kufijtë dhe të përdorë mënyra të ndryshme për të realizuar dëshirat e veta.
Si duhet të veprojnë prindërit?
Ruani qetësinë dhe mos u dorëzoni. Prindërit duhet të pranojnë emocionet e fëmijës, por pa u nënshtruar ndaj sjelljes së tij. Për shembull, mund t’i thoni: “E kuptoj që je i/e mërzitur, por mund të flasim për këtë pasi të qetësohesh.”
Ndihmojeni të kuptojë që zgjidhjet nuk vijnë përmes të qarave. Pasi fëmija të qetësohet, nëse kërkesa e tij është e arsyeshme, mund ta plotësoni duke theksuar: “E shikon? Kur flasim qetësisht, mund të gjejmë një zgjidhje.”
Mbani qëndrimin tuaj edhe në publik. Mos lejoni që vështrimet e të tjerëve t’ju bëjnë të ndryshoni sjelljen. Nëse një skenë ndodh në rrugë, përsëritini fëmijës me zë të butë: “Unë jam këtu me ty, nuk je vetëm. Përpiqu të qetësohesh, siç e bëre edhe herën e kaluar.”
Lavdërojeni progresin e tij. Kur fëmija mëson të vetëqetësohet, përgëzojeni: “Sot u qetësove më shpejt se herën e kaluar. Po mëson të kontrollosh ndjenjat e tua!”
Mos lejoni ndërhyrje nga të tjerët!
Në këtë proces të rëndësishëm të ndërgjegjësimit dhe vetëkontrollit, është e rëndësishme që të tjerët – përfshirë gjyshërit apo njerëzit e rastësishëm – të mos ndërhyjnë. Prindërit janë ata që duhet ta udhëheqin fëmijën drejt zhvillimit të vetëkontrollit dhe forcimit të pavarësisë emocionale.
Nëse i ndihmoni fëmijët të mësojnë të menaxhojnë emocionet e tyre, ata do të rriten me aftësi më të mira për të përballuar sfidat e jetës!
Burimi: Telegrafi
*Klikoni KËTU për t´u bërë pjesë e kanalit zyrtar të Rrjetit të Prindërve të Kosovës në Viber.
