Shkollat të cilat do jenë implementuese të mësimit tërëditor do të funksionojnë me një kurrikulë shtesë të lëndëve dhe aktiviteteve të cilat për fokus do kenë lëndët e shkathtësisë. Drejtorë të shkollave shprehen të kënaqur me planin gjersa thonë se për këtë, në ndihmë u janë ardhur edhe mësimdhënës të profilizuar. Ata thonë se presin sukses e njëheri, rezultate më të larta në arsim.
Pesë nga shkollat e kryeqytetit, fillimi i vitit të ri shkollor po i gjenë në përgaditje shtesë ngase janë të përzgjedhurat për mësimin tërëditor.
E në këtë formë, shkollat tanimë kanë pranuar kurrikulën shtesë për kohën e pasdrekës, atë të përfundimit të orëve mësimore bazë.
Me mësimdhënës të angazhuar posaçërisht në lëndët e aktivitetet shtesë nga komuna e Prishtinës, në njërën nga shkollat tregojnë se cilat janë ato, dhe çka synohet të arrihet.
“Pas drekës, orari do të ndryshojë. Do të ketë lëndë të reja. Për shembull do të jetë kodimi, teknologji informative, programim, ndërmarrësi, ekonomi dhe biznes, lexim kuptimi dhe shkrimi, të fokusohemi aty ku kemi mbet prapa në PISA, lojëra matematikore dhe fokusi në shkencë matematikore, aktivitete humanitare, demokraci dhe lëndë që kanë të bëjnë me zhvillimin e shkathtësive”, tha Liridon Maliqi, drejtor i shkollës “Qamil Batalli”.
Në shkollën “Qamil Batalli” tanimë është përfunduar edhe kuzhina, si njëra ndër kriteret për implementimin e mësimit tërëditor.
Me rilokimin e nxënësve, po e njëjta shkollë ka pranuar një klasë nga shkolla e cila gjendet rreth 200 metra larg, “Emin Duraku”.
E nga kjo e fundit thonë se përveç se plani ekstrakurikular mbetet i përshtatshëm, i njëjti edhe ua ka lehtësuar punën.
“Do të jenë mësueset me kurrikulën bazë. Pas drekës, që i bie pas orës 12:30, do të angazhohen mësueset ndihmëse dhe mësimdhënëset e lëndëve të shkathtësisë, për t’i mbajtur orët me fëmijët, përfshirë muzikë, art, plan i detajuar për aktivitete e cila ka gjet mbështetjen. Dmth ekziston një plan i mirëfilltë se çka të bëhet pas orëve mësimore,” tha Visar Osmani, Drejtor i shkollës “Emin Duraku”.
E njohës të arsimit vlerësojnë se rreziku më i madh i mosfunksionimit të kësaj metode mbetet periudha pas lëndëve bazë.
Megjithatë, Rinor Qehaja nga instituti “Ed Guard” vlerëson se kjo metodë duhet implementuar në nivel vendi.
“Nuk duhet të fokusohet në zvogëlimin e prezencës fizike të mësimdhënësve dhe përfshirjen e nxënësve, jo vetëm sa për të mbushur orët e mësimit. Mësimi tërëditor nëse ka qëllimin e mirëfilltë të tij, për përfitim të komunitetit, duhet të kthehet si praktikë në nivel vendi për të gjitha shkollat, jo në improvizim për mumër të caktuar. Mund të pilotojmë nëse funksionon ose jo por është e rëndësishme që komuna e Ministria të nisë këtë për të gjitha shkollat e me këtë nënkuptojmë, investime kapitale, ndërtimin e shkollave të reja, rialokim të nxënësve dhe kufizimin e tyre për klasë,” deklaroi Rinor Qehaja, njohës i arsimit.
Pengesë për funksionalizimin e mësimit tërëditor në të kaluarën, përveç mungesës së kushteve, ka qenë edhe mungesa e planprogramit. /TVDukagjini
