Për shkak të reshjeve të dendura “janë shkaktuar dhe pritet të ketë edhe më tej përmbytje masive në mbarë rajonin”, i tha zëvendëskryeministri i landit Niederösterreich, Stephan Pernkopf, agjencisë austriake të lajmeve APA.
Në disa zona ka rrezik për rrëshqitje toke, sepse toka është tërësisht e lagësht. Në shumë zona rrugët janë mbuluar nga uji. Një sërë fshatrash janë të shkëputur prej pjesës tjetër të vendit.
Ky land ka njoftuar ndërkohë edhe për një të vdekur prej vërshimeve.
Një punonjës zjarrfikës humbi jetën duke punuar me një pompë thithëse të ujit në një qilar, sikurse njoftoi shtabi i krizës.
Niederösterreich është landi i goditur më rëndë prej reshjeve dhe motit ekstrem.
Në këtë land përreth Vjenës jetojnë 1,7 milionë njerëz.
Natën në të gdhirë të ditës së diel (15.09.2024) pati gati 4500 aksione të zjarrfikësit.
Në disa komuna në veri të Vjenë u desh të shpëtohen njerëzit e bllokuar nga masa e ujit nëpër shtëpi.
Ekipet e emergjencës përdorën helikopterët e gomonet. Shumë banorë pranë zonave të lumenjve u lajmëruan për evakuim që të largoheshin nga shtëpitë.
Kritike është gjendja edhe në zonën e lumenjve Kamp dhe Krems, që derdhen në Danub.
Evakuime në Çeki
Edhe në Çeki vërshimet e përmbytjet i kanë vënë në gjendje emergjence ekipet e shpëtimit. Katër vetë konsiderohen të humbur pasi i ka rrëmbyer masa e ujit.
Më i prekur është rajoni në lindje të vendit në kufi me Poloninë.
Gjatë fundjavës, kryebashkiaku i Cesky Tesin urdhëroi evakuimin e mijëra banorëve nga qendra e qytetit.
Lumi Olsa, një degë e Oderit, rrezikon të vërshojë jashtë shtratit.
Pakësimi i reshjeve pritet gjatë ditës së hënë (16.09.2024).
Për shkak të motit ekstrem në Çeki mbetën pa energji rreth 250.000 shtëpi, njoftoi agjencia CTK duke iu referuar furnizuesit me energji.
Reshje dhe përmbytje ka pasur edhe në Poloni e Rumani.
Nga të dy këto vende njoftohet edhe për viktima një person në Poloni dhe pesë të vdekur në Rumani.
Në Rumani janë dëmtuar rreth 5000 shtëpi dhe qindra njerëz u desh të shpëtohen prej vërshimeve.
“Kjo është një katastrofë e përmasave epike”, tha kryetari i bashkisë së fshatit Slobozia Conachi në rajonin Galati.
Janë përmbytur rreth 700 shtëpi, vuri në duke Emil Dragomir.
Presidenti rumun Klaus Iohannis deklaroi: “Ne jemi konfrontuar sërish me pasojat e ndryshimit të klimës, që po bëhen gjithnjë e më fort evidente në kontinent me pasoja dramatike”. /DW/
Instituti Hidrometeorologjik Kosovës ka paralajmëruar mot të vranët e me reshje shiu në javën e fundit të stinës së verës. Sipas Institutit, kjo javë vijon me mot të ndryshueshëm.
Ditën e hënë do të mbajë mot me diell dhe vranësira të shpërndara. Vranësirat gjatë ditës vende-vende mund të sjellin riga të dobëta shiu.
Temperaturat minimale do të lëvizin ndërmjet 6-9gradë Celsius, ndërsa maksimalet e ditës parashihen të lëvizin ndërmjet 15-18 gradë Celsius. Do të fryjë erë kryesisht nga drejtimi i veriperëndimit e lehtë deri mesatare.
Të martën moti do të jetë me diell dhe vranësira të shpërndara. Temperaturat minimale do të lëvizin ndërmjet 5-8 gradë Celsius, ndërsa maksimalet e ditës parashihen të lëvizin ndërmjet 15-21 gradë Celsius. Do të fryjë erë kryesisht nga veriperendimi me shpejtësi 1-5m/s.
Ditën e mërkurë do të mbajë mot i vranët dhe me intervale të shkurta me diell. Vranësirat gjatë ditës parashihen që vende-vende të sjellin riga shiu. Temperaturat minimale do të lëvizin ndërmjet 6-9 gradë Celsius, ndërsa maksimalet e ditës parashihen të lëvizin ndërmjet 16-20 gradë Celsius. Do të fryjë erë nga drejtimi i verilindjes me shpejtësi 1-6/m/s.
Të enjten do të mbajë mot me diell dhe vranësira të pakta. Vranësirat gjatë ditës vende-vende parashihen të sjellin riga shiu . Temperaturat minimale do të lëvizin ndërmjet 8-11gradë Celsius, ndërsa maksimalet e ditës parashihen të lëvizin ndërmjet 17-21gradë Celsius. Do të fryjë erë kryesisht nga veriperëndimi e lehtë deri mesatare.
Ditën e premte moti do të jetë me diell dhe vranësira të shpërndara .Temperaturat minimale do të lëvizin ndërmjet 7-10gradë Celsius, ndërsa maksimalet e ditës parashihen të lëvizin ndërmjet 18-23gradë Celsius. Do të fryjë erë nga drejtimi i jugperëndimt me shpejtësi 1-5m/s.
“Kushtet agrometeorologjike dhe biometeorologjike do të jenë të mira, kur kemi parasysh cilësinë e ajrit dhe përgatitjen e tokave për mbjelljen e kulturave vjeshtore”, njofton Instituti Hidrometeorologjik i Kosovës./Telegrafi/
