Prindër, mos zgjidhni rrugën më të lehtë: ushqeni fëmijët me dashuri, jo me para!
Të dashur prindër,
Sa i çmoj ato nëna dhe baballarë që çdo mëngjes, me përkushtim, përgatisin për fëmijët e tyre kuti ushqimore të mbushura me ushqim të shëndetshëm nga shtëpia — me pemë të freskëta, me arra, me një sandviç të thjeshtë e të pastër që u jep energji dhe i ndihmon të përqendrohen në mësime!
Por, për fat të keq, gjithnjë e më shumë po shohim një pamje tjetër në shkollat tona: shumica e prindërve po zgjedhin rrugën më të lehtë — u japin fëmijëve para në dorë dhe nuk e vrasin mendjen më shumë. E këta fëmijë çdo ditë blejnë byrekë, kifle të thata, qebapa e pleskavica, dhe i shoqërojnë me pije të gazuara që shkatërrojnë shëndetin e tyre në heshtje.
Sot, kjo duket si zgjidhje e lehtë, por nesër mund të jetë shumë vonë. Këto ushqime të përpunuara çojnë drejt mbipeshës, sëmundjeve si diabeti, përqendrimit të dobët dhe energjisë së ulët në mësime.
Prindër, e vërteta është e thjeshtë:
Kur i japim fëmijës para për të blerë ushqim, i japim atij leje të konsumojë çdo gjë të dëmshme që i del përpara.
Kur i përgatisim një kuti ushqimore nga shtëpia, i japim atij shëndet, dashuri dhe edukim për jetën.
A nuk është më mirë që një fëmijë në pushimin e madh të hapë kutinë e tij dhe të gjejë një mollë të freskët, disa arra, një sandviç me djathë e perime? Ky është kujdesi i vërtetë!
Jo para në dorë që e çojnë drejt marketeve dhe ushqimeve të pashëndetshme.
Ju ftoj nga zemra:
Le të zgjohemi si prindër, të marrim përgjegjësinë që na takon dhe të përgatisim çdo ditë për fëmijët tanë diçka të shëndetshme.
Le ta mësojmë fëmijën të thotë JO byrekut dhe pijeve të gazuara, dhe të thotë PO frutave dhe vakteve të përgatitura nga ne.
Ftoj gjithashtu çdo prind këtu në grup të ndajë një foto të kutisë ushqimore që përgatit për fëmijën e vet!
Le të frymëzojmë njëri-tjetrin me ide të reja dhe ta kthejmë këtë në një lëvizje për të mbrojtur shëndetin e fëmijëve tanë!
Mos e ushqeni fëmijën me para — ushqeni me dashuri, kujdes dhe përkushtim.
Çdo vakt i shëndetshëm sot, është një sëmundje më pak nesër.
“Më mirë një mollë sot, sesa një ilaç nesër!”
“Ushqimi i shëndetshëm — mburoja më e fortë për fëmijën tuaj!”
Me shumë respekt dhe përkushtim për të ardhmen e fëmijëve tanë.
Fatmir Selimi
