Fëmijët e ndjeshëm përjetojnë botën dhe emocionet me një intensitet të veçantë. Por si mund të dalloni nëse fëmija juaj ka këtë tipar?
Ka disa sjellje të vogla që mund të jenë tregues të qartë. Një fëmijë shumë i ndjeshëm ka një sistem nervor që reagon shpejt dhe e ndjen botën në një nivel të thellë.
“Këta fëmijë janë jashtëzakonisht të kujdesshëm dhe të ndjeshëm, por lehtësisht mund të ndihen të mbingarkuar nga stimujt e mjedisit,” thotë psikiatrja Judith Orloff.
Njohja e këtyre shenjave mund t’ju ndihmojë ta mbështesni fëmijën tuaj të ndjeshëm dhe ta ndihmoni të lulëzojë në botën e tij emocionale të pasur. Ndjeshmëria nuk është dobësi, por një superfuqi që ka nevojë të kuptohet dhe vlerësohet.
1. Nuk i pëlqejnë zhurmat e forta, aromat e rënda apo dritat e ndritshme
Një fëmijë shumë i ndjeshëm mund të shqetësohet nga tingujt e fshesës me rrymë, drita e diellit në sy apo një aromë e fortë parfumi. Ata mund të ndihen të mbingarkuar në vende të zhurmshme ose plot me njerëz.
Si prind, mund të ndihmoni fëmijën tuaj duke e parapërgatitur për situatat që mund të jenë sfiduese. Mund t’i ofroni kufje për zhurmat, rroba me material të rehatshëm apo edhe strategji të thjeshta si frymëmarrja e thellë për ta ndihmuar të menaxhojë këto ndjesi.
2. Janë të rezervuar në situata të reja
Një fëmijë i ndjeshëm ka nevojë për më shumë kohë për t’u ambientuar me një situatë të re. Ai mund të refuzojë të afrohet menjëherë te fëmijët e tjerë apo të preferojë të shikojë nga larg para se të përfshihet në lojë.
Është e rëndësishme t’i jepni hapësirë dhe kohë për t’u ambientuar, pa e detyruar të përfshihet menjëherë. Lejojeni ta vëzhgojë situatën para se të ndjehet gati për t’u bashkuar.
3. Kanë shpërthime më të forta emocionale
Fëmijët shumë të ndjeshëm përjetojnë emocionet me intensitet më të lartë. Një moment mund të jenë të qetë, dhe menjëherë pas një situate të vogël (si p.sh. të përplasen me një karrige) mund të reagojnë me lot dhe shpërthime të forta.
Gjithashtu, ata ndihen më shpejt të lodhur ose të irrituar nëse janë të uritur ose të përgjumur. Një strategji e thjeshtë për ta ndihmuar në momentet e vështira është ta mësoni të marrë frymë thellë, ose ta ndihmoni të ketë kohë për veten me aktivitete që e qetësojnë, si ngjyrosja apo dëgjimi i muzikës.
4. Ndihen të mbingarkuar nga surprizat – madje edhe ato të mira
Edhe pse shumë fëmijë entuziazmohen nga surprizat, një fëmijë shumë i ndjeshëm mund ta përjetojë atë si diçka stresuese. Edhe një surprizë e bukur, si një vizitë e papritur në klasë, mund t’i shkaktojë një reagim të fortë emocional.
Një nga mënyrat për ta ndihmuar është ta përgatisni paraprakisht. Mund t’i tregoni histori personale që t’i bëjnë të kuptojnë se surprizat janë pjesë e jetës dhe mund të menaxhohen me qetësi.
5. Marrin për sipër emocionet e të tjerëve
Një fëmijë shumë i ndjeshëm absorbon emocionet e të tjerëve. Nëse prindërit janë të stresuar ose të mërzitur, ata mund ta ndjejnë atë energji dhe madje ta fajësojnë veten për situatat që nuk kanë lidhje me ta, citon Anabel.
Është e rëndësishme t’i sigurojmë se nuk janë përgjegjës për emocionet e të rriturve dhe të komunikojmë qartë: “Ti je një fëmijë i mrekullueshëm dhe gjithçka do të shkojë mirë”. /Telegrafi/
