Ndikimi i amësisë së vetme mbi profetët: Ismaili, Musai, Isai dhe Muhammedi a.s.
Disa nga profetët më të mëdhenj të dërguar njerëzimit u rritën në familje me një prind. Më poshtë janë rrëfyer shkurtimisht historitë e nënave të katër profetëve. Forca dhe urtësia e këtyre grave madhështore janë vërtet frymëzuese për të gjithë prindërit.
Profeti Ismaili a.s. Kur’ani rrëfen historinë e Ismailit: “Dhe kur arriti ai (djali) që së bashku me të (me Ibrahimin) të angazhohet në punë, ai (Ibrahimi) tha: ‘O djali im, unë kam parë (jam urdhëruar) në ëndërr të të ther ty. Shiko pra, çka mendon ti?’ Ai tha: ‘O babai im, punoje atë që urdhërohesh, e ti do të më gjesh mua, nëse do Allahu, prej të durueshmëve!'” (Kur’ani, 37:102) Ne e dimë që Profeti Ibrahimi a.s. nuk qëndroi gjatë me të birin e tij të madh, Ismailin, pasi përçonte mesazhin popujve të Irakut, Palestinës dhe Egjiptit. Ishte e ëma e Ismailit, Haxhereja, që e rriti atë në luginat e thata të Mekës. Haxherja e mësoi Ismailin të ishte i urtë, i besueshëm dhe me vetëbesim.
Profeti Musa a.s. “Ne nënën e Musait e inspiruam: t’i japësh atij gji, e kur të kesh frikë për të, atëherë hidhe në lumë, e mos u frikëso as mos u pikëllo, se Ne do ta kthejmë atë ty dhe do ta bëjmë atë nga të dërguarit.” (Kur’ani, 28:7) Ishte nëna e Musait, duke besuar te Zoti për kujdesin e foshnjës së saj, ajo që e hodhi Musain në lumë. Pastaj, ajo vetë e rriti atë, pasi Musai refuzoi të ushqehej nga gjiri i mëndeshave në pallatin e Faraonit. Çfarë sakrifice të jashtëzakonshme bëri ajo! Ajo ia besoi Zotit jetën e foshnjës së saj dhe i brumosi cilësitë e udhëheqjes të një profeti të madh!
Profeti Isa a.s. “Përkujto kur engjëjt i thanë: ‘Oj Merjeme, Allahu të dalloi ty (me besim e karakter), të pastroi (nga shpifjet hebreje) dhe të lartësoi mbi gratë e botës.'” (Kur’ani, 3:42) Isai ishte foshnjë pa baba, i rritur nga Merjemi a.s. Ajo mishëronte standardet më të larta të dashurisë, sakrificës dhe integritetit. Merjemi a.s. u përshkrua nga Allahu në një kapitull të tërë të Kur’anit si gruaja më e pastër dhe më e lartë në besim.
Profeti Muhammed a.s. Muhammedi lindi jetim dhe e ëma e tij, Amine bint Vehab, ishte prindi i tij i vetëm. Ajo e rriti për gjashtë vite, periudhë gjatë së cilës u formuan karakteri dhe personaliteti i tij shembullor. Guximi, dashuria, ndershmëria, kreativiteti dhe vetëbesimi i tij u mbrujtën nga nëna e tij. Ndikimi i amësisë është i pamasë!
Sa nder mund t’u japim nënave tona për kontributet e tyre të paçmuara të prindërimit?
Autor: H. Altalib, O. Altalib dhe A. Ebusulejman, 2022
Udhëzues për rritjen e fëmijëve: Marrëdhëniet prind-fëmijë
