Me këtë Dokument do të mundësohet hartimi i një ligji të ri që e thjeshton vendimmarrjen dhe rrit efektivitetin e llogaridhënien e institucioneve në të gjitha nivelet e organizimit të AAP-së.
Me këtë Koncept Dokument dhe Ligjin që do të hartohet krijohen mundësi për tregun e punës dhe industrive e deri te përfituesit e fundit dhe komuniteti i të diplomuarve. Do të kemi barrë më të ulët administrative, mundësi më të mira bashkëpunimi me bizneset dhe ofrim të shërbimeve për orientim e këshillim në karrierë si komponentë shumë e rëndësishme për të rinjtë tanë.
Ligji aktual për Arsim dhe Aftësim Profesional, i cili është në zbatim nga viti 2013, pas një analize të hollësishme, është konstatuar se nuk i përmbush nevojat dhe kërkesat e kohës përfshirë avancimin, autonominë dhe funksionimin e AAP-së, financimin, arsimin dual etj.
MASHTI ka themeluar Grupin Punues për hartimin e Koncept-Dokumentit për Ligjin e ri të Arsimit dhe Aftësimit Profesional ku janë përfshirë ekspertët më të mirë të kësaj fushe, partnerët social dhe ata zhvillimor, si dhe janë zbatuar të gjithë hapat dhe procedurat që kërkohen me rregulloren e qeverisë për hartimin e dokumenteve të tilla.
Janë shqyrtuar modele dhe shembuj të suksesshëm në shtete me traditë dhe cilësi të dalluar në AAP, me qëllim të harmonizimit të programeve mësimore në fushën e arsimit dhe aftësimit profesional me kërkesat e tregut të punës.
Kujdes i veçantë i është kushtuar reformimit të strukturës institucionale në fushën e arsimit dhe aftësimit profesional në funksion të qartësimit të detyrave, thjeshtësimit të planifikimit strategjik, qartësimit të vendimmarrjes dhe rritjes së përgjegjësisë të bartësve institucional në këtë fushë.
Prinderimi.com
