Mënyrat dhe metodat për të inkurajuar fëmijët të lexojnë
Arritja e objektivit të mbjelljes së dashurisë për lexim në vetëdijen e fëmijëve ka qenë preokupim dhe ende mbetet preokupim i miliona njerëzve në të gjithë botën në nivel të shkollave dhe shtëpisë. Pengesat në realizim të këtij objektivi vijnë për shkak të vështirësive të të rriturve për të ndërvepruar me fëmijët, vështirësitë për të kuptuar temperamentet dhe gjendjet e tyre shpirtërore, dëshirat dhe nevojat e tyre.
Kjo gjithashtu ka ardhur për shkak të prirjes natyrale të fëmijëve për të luajtur, për t’u zbavitur dhe për të vepruar sipas tekave të momentit. Aftësia e tyre për vetëpërmbajtje është e limituar. Për të gjitha këto arsye, gjithmonë kanë ekzistuar këshilla dhe përvoja për prindërit e rinj për t’i ndihmuar ata në inkurajimin e fëmijëve në lexim dhe për të bërë të lexuarit një përbërës të përhershëm të rutinës ditore.
Tani po paraqes mënyrat dhe metodat më të rëndësishme, të cilat mund t’u ndihmojnë prindërve të arrijnë sukses në këtë përpjekje të inkurajimit të fëmijëve të tyre në lexim:
Përkushtimi, para së gjithash
Në faqet vijuese do të vihet re se ndonëse ky libër përqendrohet më tepër në gjërat esenciale, në të gjenden mjaft këshilla, të cilat duhet të zbatohen me qëllim të bërjes së leximit të dashur për fëmijën. Natyrisht se zbatimi i këtyre këshillave e ka çmimin e vet. Kur shohim gjendjen momentale, gjejmë se shumica e njerëzve mund ta paguajnë këtë çmim, mirëpo ata nuk merakosen fare ose nuk i kanë njohuritë e domosdoshme.
Është e vërtetë se shumica e prindërve do të dëshironin t’i shihnin fëmijët e tyre ndër më të mirët, mirëpo ata nuk dinë si ta arrijnë këtë. Prandaj unë them se nëse ekziston gatishmëria, do të gjendet edhe rruga. Nëse jeni seriozë ju duhet dhe mundeni të kërkoni mënyrën e duhur dhe të gjeni njohuritë e kërkuara.
Kemi shembullin e një shkrimtareje, e cila investoi shumë kohë dhe mund në gjetjen e mënyrës më të mirë për të rritur fëmijë të dalluar. Përkushtimi i saj e çoi në zbulimin e talentit të saj të të shkruarit. Ajo tregon: “Karrierën time si shkrimtare e fillova në një fazë mjaft të hershme, kur fëmijët e mi ishin të vegjël.
Atyre u lexoja disa libra dhe tregime dhe nganjëherë u rrëfeja tregime nga imagji- nata ime. Këto tregime që i imagjinoja i lidhja me ngjarjet e nxjerra nga jeta jonë e përditshme. Vura re se atyre u pëlqenin tregimet e mia dhe më nxisnin t’ua përsërisja. Meqenëse dëshiroja t’i mbaja në mend këto tregime, fillova t’i shkruaja.”
“Të copëtohet zemra kur sheh se çfarë dështimi kemi në kujdesin ndaj fëmijëve kur bota vazhdon të bëjë progres dhe të avancojë. Ky avancim thellon dallimin midisi atyre që lexojnë dhe qëndrojnë të informuar për gjërat dhe të rinjve, të cilët sorollaten kot së koti, duke mos ndierë nevojën që të lexojnë diçka. Ata vetëm thellohen në injorancën e tyre.”
Përgatiti: Prinderimi.com
Autor: Dr. Abdulkerim Bekkar, ”Fëmija lexon”
