Besoj se më së shumti u mohojmë fëmijëve lirinë e zgjedhjes. Na duken më me vend zgjedhjet që bëjmë në emër të tyre, sepse ata janë ende të vegjël. Por nuk arrijmë të kuptojmë se me këtë sjellje ne i bëjmë fëmijët ta paguajnë shtrenjtë.
Ne bëjmë të gjitha zgjedhjet e tyre, duke filluar nga veshja e deri te ushqimi. Është e kuptueshme se ne kërkojmë që ata të ushqehen më mirë e të vishen më bukur. Por ky qëndrim pengon që fëmijët të kenë besim te vetja. Gjithnjë e më shumë, ata nuk arrijnë më të bëjnë zgjedhjet e tyre.
Ka plot të rritur që nuk mund të shkojnë të vetëm për të blerë. Ata ua lënë në dorë shokëve zgjedhjen për nevojat që kanë, ose e bëjnë këtë punë duke u konsultuar me të tjerët.
Ka plot njerëz që thonë, “Gruaja më blen gjithçka, duke filluar nga çorapet e deri të brendshmet.”, e madje lëvdohen me këtë. A nuk ju duket e çuditshme që dikush të zgjedhë gjithë veshjet tuaja, e kjo të mos ju shqetësojë? Sigurisht, nëse jeni një ndër këta njerëz, nuk ju duket e çuditshme. Madje edhe e racionalizoni çështjen duke thënë: “E ç’ka këtu? Fakti që partnerja zgjedh veshjet e mia, kënaq atë dhe mua.” Nëse kjo çështje kufizohet vetëm me veshjet, mbase nuk përbën problem për ju. vallë a është edhe partnerja juaj, në një mendje me ju? Apo ndoshta druhet se nuk keni shije e nuk dini të zgjidhni?
Personat që e kanë të vështirë të bëjnë zgjedhje, janë patjetër me shije të afërt. Përndryshe jeta do të ishte shumë e vështirë për ta.
Nëse problemi mbetet vetëm me kufizimin e lirisë së zgjedhjes së fëmijës apo me vështirësitë që kanë të rriturit për të zgjedhur veshje, kjo është prapë gjë e mirë. Por për fat të keq, ata kanë të vështirë të bëjnë zgjedhje kur përballen me probleme serioze në jetët e tyre. Ata kërkojnë thuajse gjithmonë dikë përreth me të cilin mund të konsultohen në lidhje me jetët e tyre.
Edhe nëse ata kanë një martesë të trishtë, apo duan të divorcohen, nuk duan t’i marrin vetë vendimet; ata ose pyesin dikë tek i cili kanë besim, ose konsultohen me një specialist. Sigurisht që përgjigja e një specialisti me mend në kokë do të ishte “Kjo është jeta jote, ti je i detyruar të vendosësh se çfarë do të bësh” duke e detyruar të bëjë zgjedhjet e veta.
Do të ishte shumë mirë nëse zgjedhjet që bëjnë të tjerët për ne do të kishin rezultate pozitive; po nëse rezultojnë negative? Në këto kushte problemet që mund të lindin me këtë persona janë të pashmangshme. Problemet tona me ta ndryshojnë në varësi të madhësisë së problemit që kemi. Jini vetvetja e mos vendosni në emër të askujt. Lërini të tjerët të bëjnë zgjedhjet e tyre.
Përgatiti: Perparim Blakaj, Prinderimi.com
Autor: Saim Koç & Nil Gün, ”Vetëvlerësimi”
