Kanceri i zorrës së trashë po godet gjithnjë e më shumë amerikanët nën moshën 50 vjeç dhe një studim i ri përshkruan shenjat paralajmëruese që këta pacientë hasin në fillim.
Analiza u bazua në të dhënat nga 80 studime të ndryshme, që përfshinin pothuajse 25 milionë pacientë nën moshën 50 vjeç, shkruan burimi Health Day përcjell Gazeta Shneta.
Në pothuajse gjysmën (45%) e rasteve, gjaku në jashtëqitje ishte një simptomë fillestare, e ndjekur nga ngërçet e barkut (40% të rasteve) dhe ndryshime në zakonet e zorrëve (27% të rasteve), sipas një ekipi të udhëhequr nga Joshua Demb student i diplomuar në gastroenterologji në Universitetin e Kalifornisë, San Diego.
“Koha nga paraqitja e shenjave ose simptomave deri në diagnostikimin e hershëm të kancerit kolorektal ishte shpesh midis 4 dhe 6-muajsh,” shkroi ekipi i Demb.
Gjetjet u botuan më 24 maj në revistën “JAMA Network Open”.
Shoqata Amerikane e Kancerit, publikoi statistika në raportin e saj të 2024-ës, duke bërë që shumë ekspertë të bëjnë thirrje për shqyrtim më të mire të kancerit te pacientët më të rinj.
Numrat janë “alarmantë”, tha Dr. Folasade May, një studiuese për parandalimin e kancerit dhe gastroenterologe në UCLA Health në Los Angeles.
“Që nga viti 1995, ka pasur një rritje prej 45% të diagnozave të kancerit kolorektal tek njerëzit nën moshën 50 vjeç,” vuri në dukje ajo.
Rritja e rasteve ishte aq dramatike sa në vitin 2021 Task Forca e Shërbimeve Parandaluese të SHBA uli moshën e rekomanduar të ekzaminimit të parë nga 50 në 45-vjeç.
Jashtëqitja e përgjakshme, veçanërisht, duhet të jetë një flamur i kuq. Sigurisht, gjaku në jashtëqitje mund të sinjalizojë çdo numër problemesh gastrointestinale, kështu që kanceri nuk është i vetmi shkak i mundshëm.
Por grupi i Demb zbuloi se jashtëqitja e përgjakshme tek njerëzit nën moshën 50 vjeç lidhej me një rrezik pesëfish më të lartë për kancer të zorrës së trashë, krahasuar me njerëzit pa këtë simptomë.
Sigurisht, ekzaminimi rutinë i kancerit të zorrës së trashë – qoftë nëpërmjet testeve të bazuara në jashtëqitje dhe/ose kolonoskopisë/sigmoidoskopisë – është thelbësor në zbulimin e hershëm të kancerit të zorrës së trashë, thonë ekspertët. /Gazeta Shneta/
