Posedimi i armëve të zjarrit në mënyrë të paligjshme është shndërruar në një fenomen shqetësues që jo vetëm shkel ligjin, por edhe rrezikon seriozisht sigurinë publike. Policia e Kosovës vazhdon të zbulojë raste të individëve që mbajnë armë ilegalisht, përfshirë të miturit, të cilët shpesh shfaqen në rrjetet sociale me pamje që i glorifikojnë armët.
Një rast i tillë u zbulua së fundmi në fshatin Vitomiricë të Pejës, ku Policia arrestoi një 17-vjeçar për posedim të armëve pa leje.
I mituri kishte publikuar në rrjete sociale video ku shihej me një armë në brez, të cilën e mbante pa autorizim, duke ngritur shqetësime për sigurinë e tij dhe të tjerëve.
Pas një operacioni të shpejtë, Policia ndërhyri dhe e arrestoi të riun, ndërsa arma ende nuk është gjetur.
Me urdhër të prokurorit, i dyshuari është dërguar në paraburgim, dhe ndaj tij është hapur procedura penale për veprën ‘Mbajtje në pronësi, kontroll ose posedim të paautorizuar të armëve’.
Sipas ligjit në fuqi, çdo person që posedon armë në kundërshtim me rregulloret ligjore përballet me dënime që variojnë nga gjoba prej deri në 7,500 euro, deri në burgim për një periudhë deri në pesë vjet.
