Çdo njeri ka nevojë të dijë se është i rëndësishëm për të tjerët. Nëse nuk arrin ta sigurojë këtë rëndësi në mënyrë të dobishme, ai zgjedh mënyra të pashëndetshme.
Mark Chapman deklaroi për mediat në lidhje me John Lennonin – “E qëllova sepse doja të isha i rëndësishëm”. (Megjithëse nuk e kujtojmë për mirë emrin e Chapmanit, ne e kujtojmë atë. Ky ishte edhe qëllimi i tij.)
Rëndësia për veten, është rëndësia e merituar që i jep njeriu vetes. Kjo nuk është të mendosh, pora ta dish se je i rëndësishëm. Ne mund ta posedojmë rëndësinë për veten, po aq sa kemi të zhvilluar vetë-përgjegjësinë.
Ndikimi i çdokujt, mund të jetë pozitiv ose negativ te të tjerët. Me këtë ndikim ne krijojmë realitetin tonë.
Njeriu me respekt të ulët ndaj vetes përpiqet të bëjë të dukshëm ndikimin e tij duke bërë keq, në këtë mënyrë përpiqet të evidentohet. Edhe urrejtja është një lloj rëndësie negative. Kë do të preferonin njerëzit? Të urreheshin, apo të mos merreshin në konsideratë? Mos marrja në konsideratë është një ndjesi e papërballueshme. Njerëzit që përpiqen t’u dëgjohet emri duke krijuar skandale, janë ata që kanë nevojë të lartë që t’u kushtohet rëndësi.
Rëndësia për veten është të jemi të ndërgjegjshëm kemi ndikim. Personi me respekt të zhvilluar për veten, arrin të dallojë ndikimin që krijon tek të tjerët me anë të sjelljes. Nëse reagimi i tij sjell një rezultat pozitiv, vëren se reagimet janë të shëndetshme, nëse reagimi është negativ, nxjerr mësim. Ne ndihemi të rëndësishëm po aq sa krijojmë ndikim pozitiv. Ose thënë ndryshe, na ngrihet niveli i rëndësisë për veten.
Rëndësia për veten është të dimë se jemi arkitektë të jetës tonë. Është të duam veten pa gjykuar anët pozitive apo negative. Rëndësia për veten zhvillohet duke marrë përsipër të gjithë përgjegjësinë në lidhje me jetën, ose thënë ndryshe të marrim përsipër përgjegjësinë ndaj vetes.
Ne mund të jemi mjaft të përgjegjshëm në punë, mund të ndiheni të përgjegjshëm kundrejt anëtarëve të tjerë të familjes, madje mund të marrim përsipër edhe përgjegjësitë e tyre, por kjo nuk do të thotë se përgjegjësia për veten është e lartë. Përkundrazi kjo tregon se nuk i kushtojmë sa duhet rëndësi vetes. Nëse të tjerët janë mbi ne në listën e përparësive, ne nuk marrim përgjegjësinë ndaj vetes, por kemi si përparësi të plotësojmë nevojat e të tjerëve, duke lënë në plan të dytë nevojat e vetes. Për rëndësinë ndaj vetes duhet të plotësohen katër veçori. Këto janë, sinqeriteti, përgjegjësia ndaj vetes, besimi dhe dinjiteti.
Përgatiti: Prinderimi.com
Autor: Saim Koç & Nil Gün, ”Vetëvlerësimi”
