Çrregullimi i të shprehurit me shkrim është një paaftësi e të mësuarit në të shkruar. Ai nuk përfshin aftësi teknike si drejtshkrimi dhe shkrimi i dorës. Vështirësia në ato zona/fusha nganjëherë quhet disgrafi. Njerëzit me këtë çrregullim e kanë të vështirë të vënë idetë e tyre në formë të shkruar. Ata gjithashtu bëjnë gabime të shpeshta në gramatikë dhe shenja pikësimi.
Në vend të kësaj, njerëzit me këtë paaftësi të të mësuarit kanë vështirësi të shprehin mendimet e tyre me shkrim. Ata mund të kenë idetë më të mira, por shkrimi i tyre është i çorganizuar dhe plot me gabime gramatikore dhe pikësimi.
Çrregullimi i të shprehurit me shkrim nuk është aq i njohur sa disleksia. Por në fakt mund të jetë më i zakonshëm. Ekspertët mendojnë se midis 8 dhe 15 për qind e njerëzve e kanë atë.
Fëmijët nuk e tejkalojnë çrregullimin e të shprehurit me shkrim me rritjen e tyre. Ai është i përjetshëm dhe shkaktohet nga ndryshimet në tru. Gjithashtu shpesh bashkë-ndodh me sfida të tjera të të mësuarit. Dy nga më të zakonshmet janë disleksia dhe ADHD .
Nuk ka ndonjë program mësimor gjithëpërfshirës komercial të disponueshëm për vështirësitë në shkrim. Por ka strategji dhe teknika që mund t’i ndihmojnë njerëzit të menaxhojnë sfidat dhe të përmirësojnë aftësitë e tyre.
Njerëzit mund të vlerësohen për aftësi të kufizuara në shkrim në çdo moshë. Fëmijët mund të marrin një vlerësim falas në shkollë. Të rriturit zakonisht i bëjnë ato privatisht. Testet janë të ndryshme për fëmijët dhe të rriturit.
Çrregullimi i të shprehurit me shkrim ndikon në të mësuar. Ai mund t’i bëjë sfiduese disa detyra në punë. Por është e rëndësishme të dini se njerëzit me aftësi të kufizuara në të mësuar janë po aq të zgjuar sa njerëzit e tjerë.
Shenjat dhe simptomat e çrregullimit të të shprehurit me shkrim
Problemet me të shprehurit me shkrim janë një problem me gjuhën, ashtu siç është disleksia. Por kjo nuk ndikon domosdoshmërisht se sa mirë shprehen njerëzit kur flasin. Njerëzit me çrregullim të të shprehurit me shkrim mund t’ju tregojnë një histori të mrekullueshme që është e organizuar mirë dhe e detajuar. Por kur përpiqen ta shkruajnë atë, atëherë ata hasin në telashe.
Kur njerëzit luftojnë me të shprehurit me shkrim, ajo mund të shfaqet në mënyra të ndryshme. Këtu janë disa gjëra që mund të shihni në punën e tyre të shkruar:
- Fjalë që keqpërdoren ose që kanë kuptim të gabuar
- Të njëjtat fjalë përdoren pa pushim
- Gabimet themelore gramatikore, si foljet që mungojnë ose vendosja e pasaktë emër-folje
- Fjali që nuk kanë kuptim
- Ese dhe letra të çorganizuara
- Punë me shkrim që duket e paplotë
- Mungojnë fakte dhe detaje
- Shkrim i ngadaltë me dorë apo me makinë
Ka edhe shenja në sjellje që perfshin:
- Justifikimet dhe shmangia e detyrave me shkrim
- Ankesa se nuk është në gjendje të mendojë se çfarë të shkruajë ose si të fillojë
- Ulje për një kohë të gjatë në tavolinë pa shkruar
- Përfundimi i një detyre me shkrim shpejt pa e menduar shumë
Si diagnostikohet çrregullimi i të shprehurit me shkrim
Mënyra e vetme për të ditur nëse dikush ka një problem me të shprehurit me shkrim është të keni një vlerësim të plotë. Fëmijët mund ta marrin një të tillë falas në shkollë.
Disa profesionistë bëjnë vlerësime private, të cilat mund të jenë shumë të shtrenjta. Në disa raste, ka mënyra për të marrë vlerësime private falas ose me një kosto të ulët. Universitetet me programe në psikologji ose në shkencat e komunikimit dhe çrregullime shpesh kanë klinika ku studentët bëjnë trajnimin e tyre.
Spitalet mësimore mund të kenë projekte kërkimore ku njerëzit mund të marrin vlerësime falas.
Vlerësuesit përdorin një sërë testesh për të parë aftësitë e të shkruarit. Ata gjithashtu testojnë forcat dhe sfidat në fusha të tjera. Shumë njerëz me çrregullim të të shprehurit me shkruim kanë gjithashtu dallime të tjera të të mësuarit dhe të menduarit, si disleksia ose ADHD.
Ka disa lloje profesionistësh që bëjnë vlerësime. Këtu përfshihen psikologët e shkollës, psikologët klinikë, patologët e të folurit dhe neuropsikologët.
Marrja e një diagnoze (shkollat e quajnë atë një identifikim) mund të çojë në ndihmë shtesë në shkollë. Disa fëmijë mund të marrin gjithashtu udhëzime të specializuara. Një diagnozë mund të çojë gjithashtu në akomodime në kolegj dhe në punë.
Autorët: Ekipi i Understood-it
Përktheu: Bujar Sejdiu
