Kur fëmijës i ngarkon ndonjë punë, ai e ndjen veten me vlerë dhe mendon se ka aftësi, që i bën të tjerët të mbështeten tek ai për shkak të këtyre aftësive. Kjo bën që tek ai të ngulitet besimi në vetvete, gjë që konsiderohet si një nga bazat kryesore në ndërtimin dhe formimin e yjeve të ardhshme.
Për shembull, mësojini vajzës së vogël përgatitjen e disa llojeve të ushqimit dhe të sallatave, e më pas le të ngarkohet me detyrën e përgatitjes së një pjese të menysë së drekës ose të darkës. Po kështu, mund t’i kërkoni djalit që të instalojë një program të caktuar në kompjuterin tuaj personal, apo t’i kërkoni atij që të mësojë disa pro- grame ose detyra të tjera të ngjashme me këto.
Nuk e privojnë fëmijën nga e drejta e tij për të luajtur
Studiuesit dhe specialistët e fushës së edukimit dhe të kujdesit për shëndetin mendor tek fëmijët, theksojnë rëndësinë e argëtimit, ose të lojës, si një nga mjetet dhe metodat që ndihmojnë në zhvillimin e shëndetshëm të fëmijëve dhe në formimin e personalitetit të tyre individual.
Privimi i tyre nga argëtimi dhe lojërat ndikon negativisht në zhvillimin e tyre të natyrshëm. Disa prindër i privojnë fëmijët e tyre nga argëtimi, ose nuk u japin kohën e mjaftueshme, me pretendimin se e gjithë koha e tyre është e zënë me studim. Madje, disa prej këtyre prindërve i mbyllin fëmijët brenda në shtëpi, nga frika se mund të kenë kontakt me shoqëri të keqe dhe mund të ndikohen prej tyre. Kjo gjë bën, që të rriten fëmijë, të cilëve u mungojnë shumë prej aftësive dhe dhuntive. Loja e fëmijëve ka shumë rezultate pozitive, nga të cilat po përmendim:
a. Aftësitë lëvizëse që e forcojnë trupin e tyre.
b. Aftësitë zbuluese.
c. Ngopje të instinktit të lëvizjes.
ç. Loja i ndihmon fëmijët që të grumbullojnë një sasi njohurish dhe termash gjuhësore.
d. Me anë të lojës fëmijët zbulojnë dhe njihen me botën rreth tyre.
Dijetari gjerman Karl Bjoler e ka theksuar rëndësinë që ka argëtimi në zhvillimin mendor të fëmijëve, ndërsa dijetari rus Makarenko ka treguar ndikimin e argëtimit në formimin e personalitetit të fëmijës, sidomos ato lloj lojërash që zhvillojnë muskujt dhe forcojnë trupin, si dhe ato që zhvillojnë logjikën, sikur ato që i përmendëm në kapitullin e rrugëve të zhvillimit të kreativitetit tek fëmijët.
Omeri thoshte: “Mësojuani fëmijëve tuaj notin, gjuajtjen me shigjeta dhe ngasjen e kuajve me vrap”.
Përgatiti: Prinderimi.com
Autor: Abdulhamid Bilali, ”Si ta bësh fëmijën tënd yll”
