Adoleshenca është një fazë e rëndësishme e zhvillimit të njeriut, e cila karakterizohet me tranzicion nga fëmijëria në moshën e rritur. Gjatë kësaj periudhe, individët përjetojnë ndryshime të shumta, qofshin ato fizike, emocionale, apo psikologjike.
Krahas ndryshimeve të natyrshme që ndodhin në organizëm, jo rrallë herë mund të ndodhin edhe çrregullime në sisteme të ndryshme. Një prej tyre është anoreksia, e cila paraqet një çrregullim të të ngrënit dhe është shumë shpesh prezente gjatë kësaj grupmoshe dhe rrallë mund të shfaqet më herët.
Karakterizohet nga frika ekstreme e shtimit të peshës dhe një perceptim i gabuar i trupit, pasi adoleshentët i kushtojnë jashtëzakonisht shumë rëndësi dukjes së jashtme dhe ndihen me më shumë komplekse. Kjo rezulton me kufizime në sasi të ushqimit, vjellje të provokuar, keqpërdorim të barnave me diuretikë (medikamente që stimulojne diurezën) dhe emetikë (medikamente që nxisin vjelljen).
Ky çrregullim shfaqet më shpesh te vajzat dhe më pak te djemtë. Përveç humbjes në peshë, e cila është e dukshme, mund të ndodhin edhe çrregullime të ciklit menstrual, deficite të vitaminave, prishje të ekuilibrit të elektroliteve, nivele të ulëta të proteinave, apo edhe anemi.
Deficitet e vlerave ushqyese mund të manifestohen me çrregullime tjera. Ndryshimet mund të paraqiten në gojë në formë të inflamacionit, i cili mund të lokalizohet në gjuhë, në mishrat e dhëmbëve, si dhe rriten gjasat për shfaqjen e kariesit. Si pasojë e vjelljeve të provokuara, vjen deri te erozioni i smaltit të dhëmbëve.
Ky çrregullim mund të ketë pasoja të rënda në shëndetin e njeriut; duke filluar nga disa çrregullime të lehta, mund të progredojë në një fazë kronike dhe ka raste që mund të jetë edhe fatale.
Si e tillë, anoreksia kërkon një trajtim multidisiplinar, duke përfshirë bashkëpunimin e mjekëve, nutricionistëve, dhe psikologëve.
Rol të rëndësishëm luan edhe mbështetja që i ofrohet individit nga familja dhe shoqëria, si dhe rrethanat në të cilat ndodhen, pasi që shpesh herë këto mund të jenë faktorë favorizues gjatë trajtimit apo edhe e kundërta, si përkeqsues.
Autore: Dr. Marigona Gashi
Prinderimi.com
