Fjalët e vrazhda dhe të këqija tek fëmijët
Në udhën e rritjes fëmija ndeshet me njerëz të ndryshëm, sjellje të ndryshme e zakone të ndryshme dhe si fëmijë që është ndjen kënaqësi të madhe kur çdo gjë të re që sheh e provon në praktikë.
Në periudhën parashkollore kur fëmijën e lumturon mësimi i fjalëve të reja, në fjalorin e tij herë-herë futen edhe fjalë “vulgare” apo sharje. Nga kjo nuk duhet rënë në panik, pasi këto fjalë fëmija nuk i përdor duke ua ditur kuptimin, por me emocionin e të dëgjuarit për herë të parë.
A duhen ndëshkuar fëmijët kur thonë fjalë që përmbajnë sharje?
Një nënë e cila përpiqet t’i edukojë fëmijët me metoda që i ka mësuar nga familja e vet, mund t’i vërë spec djegës në gojë, një traditë e përhapur kjo apo ta dënojë fëmijën për ta bërë të heqë dorë nga përdorimi i këtyre fjalëve. Dhe në fakt fëmija mund të heqë vërtet dorë nga kjo sjellje si pasojë e dënimit, por dënimi nxit një tjetër sjellje të gabuar.
Veprimet sedër-lënduese për t’ia hequr fëmijës zakonin e përdorimit të fjalëve të këqija, nuk janë zgjidhje. Metodat jo pedagogjike si zemërimi, qortimi apo rrahja, në përgjithësi nuk e ndalojnë përdorimin e këtyre fjalëve, përkundrazi e bëjnë fëmijën që ti përdorë më shumë ato mes shokëve.
Nga lëndimi emocional i dënimit, fëmijët i drejtohen një tjetër sjelljeje të gabuar. Për këtë arsye, ndaj fëmijëve që shfaqin sjellje anormale duhen gjetur zgjidhje sa më racionale. Dënimi nuk është zgjidhje, por fillim i një tjetër problemi!
Përgatiti: Prinderimi.com
Autor: Dr. Adem Güneş, “Si veprojnë fëmijët dhe pse?”
