Çfarë bën ti kur ke frikë? . . . Ndoshta shkon me vrap për ndihmë te mami e babi. Por është edhe dikush tjetër që mund të të ndihmojë. Ai është më i fortë se të gjithë. A e di kush është? . . . Po, është Zoti. Të flasim pak për një djalosh trim me emrin Davud. Ai e dinte se Zoti do ta ndihmonte gjithmonë, prandaj nuk kishte frikë.
Që kur ishte bebe, prindërit e mësuan Davudin ta donte Zotin. Kjo e ndihmoi të mos kishte frikë, edhe kur i ndodhën disa gjëra të frikshme. E dinte se Zoti është Mbrojtësi i besimtarëve dhe se Ai do ta ndihmonte.
Një herë, kur Davudi po kujdesej për kopenë e vet, erdhi një luan i madh dhe e rrëmbeu një prej tyre dhe ju vërsul edhe Davudit. A e di çfarë bëri Davudi? Luftoj kundër luanit dhe, me sa duket, e vrau me duart e veta. Më vonë, kur një ari iu vërsul deleve dhe Davudit, Davudi e vrau edhe atë. Si mendon, kush e ndihmoi Davudin? . . . E gjete, ishte Zoti.
Në një rast tjetër, Davudi u tregua edhe më trim. Populli Beni Israil po luftonin kundër popullit amalik të Palestinës. Armiqtë e besimtarëve ishin njerëz me shtat të lartë dhe mirë të armatosur. Një nga ushtarët e tyre ishte shumë, shumë i gjatë, gjigant. E kishte emrin Xhalut. Ky tallej me ushtarët besimtar dhe me Zotin. Duke u hequr si i fortë, ai u thoshte ushtarëve besimtar që të shkonin e të luftonin kundër tij. Por, të gjithë ushtarët e popullit Beni Israil kishin shumë frikë. Kur Davudi mori vesh për këtë, i tha Xhalutit: ‘Do të luftoj unë me ty! Zoti do të më ndihmojë dhe unë do të fitoj!’ A mendon se ishte trim Davudi? . . . Po, ishte shumë trim. A do të dish çfarë ndodhi më pas?
Davudi mori hobenë e tij me pesë gurë dhe shkoi të luftonte me gjigantin. Kur Xhaluti e pa sa i vogël ishte Davudi, u tall me të. Por Davudi i tha: ‘Ti po vjen me shpatë në dorë, kurse unë po vij në emër të Zotit.’ Pastaj vuri një gur në hobe, vrapoi drejt Xhalutit dhe e gjuajti drejt tij. Guri e goditi Xhalutin mu në ballë. Gjiganti u përplas përtokë i vdekur. Ushtarët e Xhalutit u frikësuan aq shumë sa ia mbathën të gjithë.
Si arriti një djalosh si Davudi të mundte një gjigant? . . . Zoti e ndihmoi, dhe Zoti ishte shumë më i fortë se ai gjigant.
Davudi nuk kishte frikë, se e dinte që Zoti do ta ndihmonte
Çfarë mëson nga tregimi për Davudin? . . . Zoti është më i fortë se të gjithë. Për më tepër, ai është edhe Mbrojtësi yt. Prandaj, herën tjetër kur të kesh frikë, mos harro se Zoti mund të të ndihmojë të bëhesh trim.
PYETJE:
- Çfarë bëri Davudi kur luani dhe ariu i sulmuan delet?
- Çfarë i tha Davudi Xhalutit kur ky u tall me Zotin?
- Si e mundi Davudi Xhalutin?
- Pse nuk kishte frikë Davudi nga luani, ariu dhe gjiganti?
- Çfarë mëson nga ky tregim për Davudin?
Davudi është i njohur edhe me emrin David, ndërsa Xhaluti me emrin Goliat.
Davudi më vonë merr shpalljen prej Zotit dhe Zoti e zgjedh atë profet.
