Për shumë studentë që tashmë kanë përfunduar studimet themelore apo masterin, madje edhe për ata që ende janë duke studiuar, gjetja e një vendi të përshtatshëm ku mund ta zhvillojnë potencialin e tyre profesional është më shumë se e mirëpritur. Por një vend pune nuk përcaktohet vetëm nga mundësia për të pasur një pagë apo për të ndërtuar një karrierë. Një ambient i mirë pune karakterizohet edhe nga punëdhënës të përgjegjshëm dhe etikë, mundësitë për zhvillim profesional dhe, mbi të gjitha, nga etika njerëzore që u jep kuptim marrëdhënieve ndërnjerëzore brenda tij.
Sidoqoftë, të gjitha marrëdhëniet ndërnjerëzore dhe profesionale kërkojnë dyanshmëri. Rrjedhimisht, edhe punëtori është ai që duhet të japë maksimumin e tij në punë, duke kontribuar në mënyra të ndryshme për organizatën apo vendin ku punon dhe duke u bërë faktor i rritjes së cilësisë dhe produktivitetit të tij.
Bring Your Manners to Work Day, ose Dita e mirësjelljes në vendin e punës, është një ditë që i kushtohet rëndësisë së mirësjelljes, respektit dhe komunikimit profesional në ambientin e punës. Ajo festohet çdo vit të premten e parë të shtatorit, ndërsa në vitin 2026 shënohet më 4 shtator. Dita u krijua në vitin 2013 nga The Protocol School of Washington, për të rikujtuar se sjellja e mirë nuk duhet të mbetet vetëm në jetën private, por duhet të jetë pjesë edhe e marrëdhënieve me kolegët, drejtuesit dhe klientët.
Ajo që e bën këtë ditë të rëndësishme për ne si prindër dhe edukatorë është vetëdijesimi ynë dhe i fëmijëve tanë, të cilët një ditë do të bëhen pjesë e tregut të punës. Përgatitja për një karrierë nuk fillon vetëm në universitet apo në intervistën e parë të punës. Ajo fillon shumë më herët, përmes mënyrës se si fëmijët mësojnë të komunikojnë, të respektojnë të tjerët, të përmbushin përgjegjësitë dhe të bashkëpunojnë.
Disa nga mënyrat se si mund t’i edukojmë fëmijët dhe nxënësit për etikën e tyre në punë përfshijnë:
1. Kryerja e punës me përkushtim
Duhet t’i edukojmë fëmijët që ta respektojnë punën dhe përgatitjen e tyre profesionale duke u përpjekur t’i kryejnë detyrat sa më mirë. Kjo nënkupton të jenë të kujdesshëm, krijues, të saktë dhe të gatshëm të përmirësohen. Përballja me detyra sfiduese mund të ndihmojë në zhvillimin e aftësive dhe në përmirësimin e të nxënit afatgjatë. Ky koncept njihet në edukim si “vështirësia e dëshirueshme” (desirable difficulty).
2. Respektimi i kohës dhe hapësirës së të tjerëve
Fëmijët duhet të mësojnë se koha e tyre nuk është më e rëndësishme se koha e dikujt tjetër. Pritja, dëgjimi, mosndërprerja e të tjerëve dhe respektimi i hapësirës personale janë aftësi që ndërtojnë marrëdhënie më të shëndetshme profesionale. Në vendin e punës, respekti fitohet përmes sjelljes së vazhdueshme, jo përmes kërkimit të vëmendjes.
3. Marrja e përgjegjësisë për gabimet
Gabimet janë pjesë e çdo pune. Ajo që ka rëndësi është mënyra se si reagojmë ndaj tyre. Fëmijët duhet të mësojnë të pranojnë gabimet, të kërkojnë falje kur është e nevojshme dhe të përpiqen t’i korrigjojnë ato, në vend që të fajësojnë të tjerët. Kjo tregon sinqeritet, pjekuri dhe gatishmëri për përmirësim.
4. Respektimi i diversitetit dhe mendimeve të ndryshme
Në një vend pune do të takojmë njerëz me ide, përvoja dhe mënyra të ndryshme të të menduarit. Fëmijët duhet të mësojnë të shprehin mendimin e tyre pa nënçmuar atë të tjetrit. Të mos pajtohesh me një koleg nuk do të thotë ta mosrespektosh atë.
5. Respektimi i hierarkisë, pa humbur respektin për askënd
Në një organizatë mund të ketë persona me role, përgjegjësi dhe nivele të ndryshme autoriteti. Fëmijët duhet të mësojnë të respektojnë përgjegjësitë dhe rolet e të tjerëve, por gjithashtu të kuptojnë se respekti duhet të jetë i dyanshëm dhe se çdo person meriton të trajtohet me dinjitet.
6. Të mësuarit për të bashkëpunuar
Suksesi në punë rrallë është vetëm individual. Fëmijët duhet të mësojnë të ndajnë detyrat, të dëgjojnë kolegët, të ofrojnë ndihmë dhe të pranojnë ndihmën e të tjerëve. Një ekip i mirë ndërtohet mbi besimin dhe bashkëpunimin.
7. Komunikimi me respekt
Mënyra se si themi diçka është po aq e rëndësishme sa ajo që themi. Fëmijët mund të mësojnë të përdorin një gjuhë të qartë dhe të sjellshme, të shmangin ofendimet, thashethemet dhe komunikimin agresiv dhe të dinë të japin kritika në mënyrë konstruktive.
Në fund, mirësjellja në vendin e punës nuk është vetëm çështje etiketimi apo formaliteti. Ajo është pjesë e karakterit, përgjegjësisë dhe mënyrës se si zgjedhim t’i trajtojmë njerëzit. Prandaj, edukimi për një ambient të shëndetshëm pune fillon shumë përpara se fëmija të marrë vendin e tij të parë të punës – fillon në familje, në shkollë dhe në marrëdhëniet e përditshme me të tjerët.
Dobitë e mirësjelljes në punë:
Bëhesh model për të tjerët për të mirë, dhe kjo krijon një kulturë pune të gjithmbarshme që jeton.
Kjo nënkupton po ashtu lënien e një trashëgimie (legacy), e cila mund t’i ndryshojë edhe sjelljet e njerëzve të tjerë, të kujtohesh gjithnjë për të mirë, qoftë kolektivisht apo personalisht. Lënia e trashëgimisë morale është rezultat i mishërimit të punës me jetën morale dhe shpirtërore dhe përmbushjes apo realizimit personal maksimal.
Ndryshimi i standardeve në vendin e punës. Nëse ke punuar për një kohë në një ambient dhe ke treguar integritet, profesionalizëm dhe përkushtim, dhe kjo ka sjellë rezultat, atëherë menaxherët apo personat që e kanë vërejtur këtë aktivitet mund ta aplikojnë atë përkushtim edhe në nivele të tjera. Për shkak se puna e thellë jep ndikim, ajo e ka këtë forcë të ndikimit.
Ngritja në detyrë. Mirësjellja, respekti dhe gatishmëria për të bashkëpunuar mund të ndikojnë edhe në mënyrën se si një punonjës perceptohet profesionalisht. Një person që sillet me respekt ndaj kolegëve, komunikon mirë dhe krijon marrëdhënie të shëndetshme në ekip mund të fitojë më shumë besim nga menaxherët dhe kolegët, gjë që mund të kontribuojë në mundësi më të mëdha për përgjegjësi dhe ngritje në detyrë. Hulumtimet mbi lidershipin dhe efektivitetin në punë e lidhin inteligjencën emocionale dhe aftësitë ndërpersonale me performancën dhe efektivitetin profesional.
Prinderimi.com
