Rektori i Universitetit të Prishtinës, Prof. Arben Hajrullahu, së bashku me prorektorët Naim Jerliu, Albana Berisha-Qehaja, Rozafa Basha e Avni Hajdari, vizitoi të premten Fakultetin e Mjekësisë, ku u takua me dekanin e fakultetit, prof. Sefedin Muçaj, prodekanët, shefat e departamenteve të Mjekësisë së Përgjithshme, Stomatologjisë, Farmacisë, Fizioterapisë dhe Infermierisë, si dhe me përfaqësuesit e studentëve.
Gjatë kësaj vizite, u inaugurua funksionalizimi i modulit të ri në SEMS për evidentimin elektronik të mbajtjes së procesit mësimor, i cili realizohet përmes skanimit të QR kodeve. Vendosja e plotë e këtij sistemi shënon një hap të rëndësishëm drejt modernizimit dhe lehtësimit të monitorimit të procesit mësimor, duke mundësuar mbajtjen e evidencave në mënyrë të saktë dhe efikase.
Në takimin me stafin drejtues të fakultetit, u diskutua mbi mbarëvajtjen e procesit mësimor, si dhe sfidat e planet për zhvillimin e mëtejshëm të Fakultetit të Mjekësisë.
Në veçanti, u theksua rëndësia e angazhimit të përbashkët për përmirësimin e mjedisit akademik dhe krijimin e kushteve të favorshme për zhvillimin profesional të studentëve dhe stafit, si dhe zhvillimin e kapaciteteve kadrovike dhe përmirësimin e infrastrukturës mësimore dhe të hulumtimeve shkencore.
Gjatë diskutimeve me përfaqësuesit e studentëve, u trajtuan tema të ndryshme në lidhje me përmirësimin e kushteve të studimit.
Rektori dhe ekipi i tij vizituan disa prej laboratorëve dhe hapësirave mësimore në Fakultetin e Mjekësisë, duke vlerësuar investimet e kryera dhe ato të planifikuara për të ardhmen. Ata gjithashtu panë edhe hapësirat dhe mundësitë që ofron biblioteka e fakultetit.
Kjo vizitë reflekton përkushtimin e menaxhmentit të Universitetit të Prishtinës për të ndjekur nga afër nevojat e fakulteteve dhe për të siguruar një mjedis sa më të përshtatshëm për zhvillimin akademik dhe profesional të studentëve dhe stafit akademik.
